Խորհրդարանական ուժերի ճնշող մեծամասնությունը սկսել է քննարկել Սահմանադրության նոր նախագիծը։ Այսօր՝ օգոստոսի 27-ին, ՀՀԿ ԳՄ նիստից հետո լրագրողների հետ զրույցում նման կարծիք հայտնեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ անդրադառնալով Սահմանադրական բաևրեփոխումների վերաբերյալ Նախագահական նստավայրում կայացած հանդիպումները։
«Յուրաքանչյուր քաղաքական կուսակցությունն ինքն է որոշում՝ մասնակցել նախագահի հետ հանդիպմանը, թե ոչ։ «Ժառանգության» դեպքում գիտենք, որ խմբակցության ղեկավարը դրական է արտահայտվել Սահմանադրական բարեփոխումների մասին։ «Ժառանգություն» խմբակցության անդամներից Ալեքսանդր Արզումանյանն ու Խաչատուր Քոքոբելյանն իրենց կուսակցությունների ներկայացուցիչների հետ ընդունել են հրավերը։ Ինչ վերաբերում է ՀԱԿ-ին, ապա այդ քաղաքական ուժն իրեն գցել է լուսանցքը»,- ասաց Շարմազանովը։
Նրա խոսքով՝ ցանկացած քաղաքական ուժ պետք է մասնակցի ընտրություններին եւ քաղաքական դեբատներին, ինչը, սակայն, ՀԱԿ-ը չի անում։ «Եթե այդ սկզբունքներն չեն պահում եւ քաղաքական ուժ են, ապա... ես ոչինչ չեմ ասում, ինքներդ դատեք»,- ավելացրեց նա։
Ինչ վերաբերում է Հանրապետության նախագահի հետ հանդիպած քաղաքական ուժերին, ԱԺ փոխնախագահը նշեց, որ այդ ուժերից մեծ մասը դրական է գնահատել խորհրդարանական համակարգին եւ համամասնական ընտրակարգին անցում կատարելը. «Կարեւոր է, որ քաղաքական բազմաթիվ ուժեր, որոնք մինչեւ այս ծանոթ չէին Սահմանադրական փոփոխություններին, այսօր ակտիվ քննարկում են եւ առաջարկություններով են հանդես գալիս»։
Հիշեցնենք, որ նախագահ Սերժ Սարգսյանը օգոստոսի 26-ին սկսել է քաղաքական խորհդրակցությունները քաղաքական ուժերի հետ՝ կապված Սահմանադրական բարեփոխումների հետ: Նախագահն արդեն հանդիպել է ԲՀԿ, ՀՅԴ եւ ՕԵԿ ներկայացուցիչների հետ: Խորհրդարանական ուժերից հանդիպմանը չեն մասնակցել ՀԱԿ-ն ու «Ժառանգությունը»։
Ավելի վաղ հայտնել էինք, որ Սահմանադրության նոր նախագիծն արդեն ուղարկվել է Ազգային ժողով: Սպասվում է, որ աշնանային նստաշրջանի առաջին քառօրյայում կսկսվեն քննարկումները: ԱԺ նախագահի խոսքով՝ աշնան վերջին արդեն նախատեսվում է հանրաքվեն: