Արարատի մարզի Սուրենավան գյուղում գյուրզա տեսակի օձի խայթոցից մահացած 54-ամյա Կարինե Թադեւոսյանի հարազատները պնդում են, որ կնոջ մահվան պատճառը Արարատի ԲԿ-ի աշխատակիցների անփույթ վերաբերմունքն է եղել: NEWS.am-ի հետ զրույցում մահացածի որդին՝ Գագիկ Թադեւոսյանը, պատմեց, որ օձի խայթելուց մոտ 15 րոպե հետո ինքը մորը հասցրել է «Արարատի» ԲԿ:
«Ես դեպքի պահին տանն եմ եղել, անմիջապես մամային հասցրել եմ Արարատի հիվանդանոց, գոռացել եմ`օձի կծած ու մամային բարձրացրել եմ հիվանդանոց: Իրենք առաջին հարկում պառկացրին, մի քանի բժիշկ հավաքվեցին, նայեցին, ու էդ ժամանակ նույնիսկ օձի կծած տեղերն էր երեւում, ոտք էլ ուռած ու կապտած չէր: Այնուհետեւ մորս բարձրացրել են ռեանիմացիա, որտեղ մի քույր կար, ու մի ասիստենտ, ես էնտեղ բժիշկ չեմ տեսել»,-ասաց նա՝ նշելով, որ հիվանդանոցում պնդում են, որ ռեանիմացիայում կնոջ մոտ բժիշկ եղել է:
Գագիկ Թադեւոսյանը համոզված չէ, որ մորը հակաթույն սրսկել են, եւ պնդում է, որ ինքը ոչ մի փաստաթուղթ չի ստորագրել հակաթույն ներարկելու վերաբերյալ:
«Մաման հիվանդանոցում խոսացել ա, ասել ա` ոտքս ցավում ա: Եթե սրսկած լինեին, ցավեր չէր ունենա: 9-10 ժամ պահել են մորս հիվանդանոցում, հետո հասկացան, որ վիճակը շատ վատ է, ոտքն արդեն չկար, ես էլ ասեցի՝ խնդրում եմ՝ իրան կյանք տվեք, թեկուզ ոտքը կտրեք: Տեսան, որ արդեն մահամերձ է, իրանք իրանց վրայից գցեցին, ուղարկեցին Երեւան, որովհետեւ իրանք չեն կարող պատասխան տալ էս դեպքի համար: Արարատի հիվադանոցի ողջ անձնակազմն է մեղավոր էս դեպքի համար, իրանք մարդու կյանքի հետ խաղ են արել»,-ասաց մահացածի որդին:
Նրա խոսքով՝ Էրեբունի ԲԿ-ում մոր վիճակը ծայրահեղ ծանր է եղել, չեն գործել երիկամները, լյարդ, 2 օր անց կինը մահացել է:
Գագիկ Թադեւոսյանը նշեց, որ ոստիկանություն չի դիմել, բայց պատրաստվում է բողոքել առողջապահության նախարարին:
«Էդ օրվա ողջ անձնակազմը պետք է պատասխան տա, որ նման դեպքեր չկրկնվեն: էսօր իմ ջահել մոր կյանքն են խլել, մյուս օրը օձը մեկին կծի, մորգի դո՞ւռ է գնալու»,-ասաց նա:
Նշենք, որ օգոստոսի 20-ին Առողջապահության նախարարության տարածած հաղորդագրության մեջ ասվում է, որ Կարինե Թադեւոսյանը հիվանդանոց է տեղափոխվել դեպքից միայն 12 ժամ անց, սակայն օգոստոսի 27-ին նախարարությունը հերքել էր իր առաջին հաղորդագրությունը՝ նշելով, որ կինը հիվանդանոց է տեղափոխվել անմիջապես օձի խայթելուց հետո: Գագիկ Թադևոսյանի դիմում-բողոքի հիման վրա դեպքի կապակցությամբ հարուցվել է վարչական վարույթ:
Ավելի վաղ NEWS.am-ը հայտնել էր, որ Արարատի մարզի Սուրենավան գյուղում օգոստոսի 17-ին տնամերձ հողամասում աշխատելիս Սուրենավանի բնակչուհի, 54-ամյա Կարինե Թադեւոսյանին օձ է խայթել։ Նրան տեղափոխել են Արարատի հիվանդանոց, այնուհետեւ Երեւան, որտեղ էլ կինը 2 օր անց մահացել է:
NEWS.am-ի հետ զրույցում Արարատի ԲԿ-ի տնօրեն Արայիկ Սարդարյանն ասել էր, որ կնոջն անհրաժեշտ բոլոր ներարկումներն արել են, սակայն կնոջ վիճակը կտրուկ վատացել է եւ իրենք նրան տեղափոխել են Երեւան: