Հայաստանի Աշխատանքի եւ սոցիալական հարցերի նախարարության սոցապահովության ծառայությունը կուսումնասիրի կենսաթոշակների վրա էլեկտրաէներգիայի սակագնի բարձրացման ազդեցությունը: Այս մասին NEWS.am-ի թղթակցի հետ զրույցում հայտարարեց Ծառայության ղեկավարի տեղակալ Սմբատ Սաիյանը:

Հարցին, թոշակառուների վրա ինչպես կանդրադառնա միջին եւ խոշոր բիզնեսի համար էլեկտրաէներգիայի սակագնի բարձրացմամբ պայմանավորված ապրանքների թանկացումը, Սաիյանը պատասխանեց, որ հարցը դեռեւս չի քննարկվում. նախ հարկավոր է գնահատել օգոստոսի գնաճի տվյալները:

«Եթե լուրջ գնաճ նկատենք, կմտածենք, թե ինչ քայլեր է պետք ձեռնարկել: Մեխանիկորեն ինչ-որ անել միայն այն պատճառով, որ էլեկտրաէներգիան թանկացել է, չենք կարող»,- պարզաբանեց Սաիյանը:

Նշենք, որ օգոստոսի 1-ից էլեկտրաէներգիայի սակագինը բացարձակ արտահայտությամբ ավելացել է 6.93 դրամով սպառողների գրեթե բոլոր խմբերի համար: Միայն խոշորագույնների համար (110 կՎ) այն բարձրացել է 4.43 դրամով: Հոսանքի ցերեկային սակագինը Հայաստանի բնակչության համար թանկացել է 16%-ով՝ 41.85-ից դառնալով 48.78 դրամ՝ 1 կՎտ/ժ-ի դիմաց (ընթացիկ փոխարժեքով՝ շուրջ 10.3 ցենտ - խմբ.):

Հայաստանի կառավարությունն օգոստոսի 1-ից բնակչության համար կսուբսիդավորի սակագնի ավելացված մասը, իսկ օգոստոսի 31-ի որոշմամբ՝ նաեւ ամսական 250 կՎտ/ժ-ից պակաս սպառող փոքր բիզնեսի համար: Մյուս ձեռնարկությունները ստիպված են նոր սակագնով վճարել, ինչն ապրանքների ինքնարժեքի ավելացման հետ կապված հարցեր է առաջացնում: