Ցանկալի է, որ Հայաստանը իր դաշնակից Ռուսաստանից էներգակիրները գնի ռուբլով։ Այս մասին սեպտեմբերի 4-ին կայացած մամուլի ասուլիսի ժամանակ հայտարարեց «Այլընտրանք» հետազոտական կենտրոնի ղեկավար Թաթուլ Մանասերյանը։
Նա երկրի ղեկավարությանը կոչ է արել հասնել նրան, որ մենք էներգակիրները ռուբլով ներկրենք։ Նրա համոզմամբ դա շահավետ կլինի։
«Երկրորդ հերթին՝ ընդհանուր ռազմավարության տեսակետից ներկայիս պայմաններում ճիշտ կլինի, եթե ռուբլու գոտու երկրներից՝ Ռուսաստանից եւ հետխորհրդային այլ երկրներից, գնենք հումքը, մշակենք եւ պատրաստի ապրանքը ուղարկենք դոլարի գոտի, որտեղ ավելի շահավետ է այն վաճառել»,- ընդգծեց Մանասերյանը։
Նա նշեց, որ ներկայումս տեղի է ունենում ոչ թե դրամի, այլ դոլարի դեվալվացիա։ «Որքան էլ որ Հայաստանի տնտեսությունը խոցելի լինի, այն ունի իր առանձնահատկությունները, եւ չի կարելի այն նույնացնել այն երկրների հետ, որտեղից գալիս է ազդեցությունը»,- նշեց Թաթուլ Մանասերյանը։
Նա հիշեցրեց, որ 2014թ. նոյեմբեր-դեկտեմբերին լուրջ ֆինանսական վարկանիշային կազմակերպություններ Հայաստանի տնտեսության անկում էին կանխատեսում։
«Այդ կանխատեսումները քաղաքականացված էին։ Հայաստանը դեռեւս ռեսուրսներ ունի երկնիշ տնտեսական աճի համար։ Փորձը ցույց է տվել, որ այդ կազմակերպությունները ուղղակի սխալվել են»,- եզրափակեց Մանասերյանը։