Այս Սահմանադրության պարագայում եթե միասեռ ամուսնություն գրանցվի, դա կլինի հակասահմանադրական: Այս մասին այսօր` սեպտեմբերի 4-ին, ԱԺ-ում խորհրդարանական լսումների ժամանակ ասաց Հրայր Թովմասյանը` պատասխանելով ՀԿ ներկայացուցիչ Ժասմինա Ղեւոնդյանի այն հարցին, թե արդյոք Սահմանադրական հանձնաժողովն արձագանքել է Վենետիկի հանձնաժողովի այն դիտարկմանը, որ Սահմանադրության նախագծում պետք է հիմքեր դրված լինեն, որպեսզի հետագայում օրենքով թույլատրվեն միասեռ ամուսնությունները։
«Պետք է կատեգորիկ լինեմ եւ ասեմ` երբեւէ Հայաստանում այս Սահմանադրության պարագայում եթե միասեռ ամուսնություն գրանցվի, դա կլինի հակասահմանադրական: Մեր Սահմանադրությունն արգելում է: Մնացածը յուրաքանչյուրդ ինչպես ուզում եք հասկացեք, ինչպես ուզում եք՝ մեկնաբանեք: Հայաստանում ամրագրված դրույթներով միասեռ ամուսնությունները ընտանիք չեն, իրենք չեն կարող դիտարկվել որպես ընտանիք, չեն կարող ընկալվել որպես ընտանիք, հասարակության միականոն բջիջ եւ չեն կարող գտնվել պետության հոգացության ներքո»,-ասաց Հրայր Թովմասյանը:
Հրայր Թովմասյանի այս հայտարարությունից հետո դահլիճում ՀԿ-ներից մեկի ներկայացուցիչը սկսեց տեղից բղավել ու անգլերեն մեջբերել, թե ինչ են ներկայացրել Վենետիկի հանձնաժողովին՝ հոգնակիով են գրել, որ կանայք եւ տղամարդիկ կարող են ամուսնանալ:
«Էդ լավ ա, որ անգլերեն գիտեք, վերցրեք հայերեն կարդացեք։ Երբ որ դուք բարձր եք խոսում, չի նշանակում, թե ճիշտ եք խոսում: Պետական լեզուն հայերենն է, եւ մատն էլ իջեցրե՛ք: Եթե եկել եք ստեղ լսելու եւ չհասկանալու, դա ձեր խնդիրն ա: Հայաստանում ընտանիքը մեկ կնոջ եւ մեկ տղամարդու միություն է, սա է մեր ընկալումը ընտանիքի, եւ սա է մեր մոտեցումը»:
ՀԿ ներկայացուցիչը շարունակեց տեղից գոռգոռալ՝ Հրայր Թովմասյանը Հովհաննես Սահակյանին դիմեց. «Էս ո՞վ ա էսի: Կանչեք ոստիկաններին, թող հանեն ստից»: