«Ոտքի Հայաստան» քաղաքացիական շարժումը Սահմանադրական բարեփոխումների դեմ բոլոր քաղաքական եւ քաղաքացիական ուժերին կոչ է անում միանալ իրեն: Այս մասին այսօր`սեպտեմբերի 4-ին, հայտարարեցին նախաձեռնության անդամները Հանրապետության հրապարակում ընթացող հանրահավաքի ժամանակ:
«Ժողովրդից ուզում են խլել ընտրելու իրավունքը: Մեր ժողովուրդն ինքն է այսօր տիրապետում այդ իրավունքին, սակայն եթե չձեռնարկենք Սահմանադրական փոփոխությունների դեմ քայլեր, մեր ժողովուրդը լուրջ խնդրի առջեւ կկանգնի: Դրա համար անհրաժեշտ է, որ բոլոր քաղաքական եւ քաղաքացիական ուժերը համախմբվեն եւ թույլ չտան ժողովրդից խլել այդ իրավունքը»,-ասաց նախաձեռնության անդամներից Անդրիաս Ղուկասյանը:
Նա նշեց, որ այսօր Հանրապետության հրապարակում «Ոտքի Հայաստան» շարժումը կմնա այնքան ժամանակ, մինչեւ ժողովրդի մոտ կտեսնեն այն մոբիլիզացիան, որը կբերի իշխանափոխության:
Անդրիաս Ղուկասյանը, խոսելով իրենց մշակած ծրագրի մասին, նշեց, որ անհրաժեշտ է Կառավարության շենքը շրջափակման մեջ պահել:
Նշենք, որ «Ոտքի Հայաստան» շարժման հրավիրած հանրահավաքին մասնակցում են «Հիմնադիր խորհրդարանի» անդամներ, որոնց թիվը շարժման մասնակիցներից ավելի շատ է: Հանրապետության հրապարակում են նաեւ մեծ թվով ոստիկաններ` Երեւանի փոխոստիկանապետ Վալերի Օսիպյան գլխավորությամբ:
Շարժման միացել է նաեւ ԱԻՄ առաջնորդ Պարույր Հայրիկյանը:
NEWS.am-ի թղթակիցը հաղորդում է, որ Հանրապետության հրապարակ մի քանի րոպեով այցելեց ԱԺ ՀԱԿ խմբակցության պատգամավոր Հրանտ Բագրատյանը, որը նշեց, որ ինքը նույնպես միանում է «Ոչ»-ի պայքարին եւ իրեն հետաքրքիր էր, թե ինչ է կատարվում Հանրապետության հրապարակում: