Հայաստանի Սահմանադրության նոր նախագծով օրգանական (սահմանադրական) օրենքների թիվը վերջնական չէ: Այս մասին սեպտեմբերի 4-ին Հայաստանի խորհրդարանում կայացած լսումների ժամանակ լրագրողներին հայտարարեց ՀՀԿ խմբակցության պատգամավոր, ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը:
«Դրանց թիվը կարող է քննարկվել նաեւ հետագայում, մենք պատրաստ ենք հիմնավորված առաջարկություններ լսել»,- հայտարարեց Սահակյանը:
Հիշեցնենք, որ ներկայում Սահմանադրական բարեփոխումների նախագծում 7 օրգանական (սահմանադրական) օրենսդրական ակտ է ներառված. Ազգային ժողովի կանոնակարգը, Ընտրական եւ Դատական օրենսգրքերը, «Սահմանադրական դատարանի մասին», «Հանրաքվեի մասին», «Քաղաքական կուսակցությունների մասին» եւ «Մարդու իրավունքների պաշտպանի մասին» օրենքները: Բոլորն էլ հնարավոր կլինի փոխել միայն ձայների 3/5-ով:
