Վրաստանը միացել է ՆԱՏՕ-ի արագ արձագանքման ուժերին։ Այս մասին ԱՄՆ նախագահ Բարաք Օբամայի կազմակերպած խաղաղապահությանը նվիրված ՄԱԿ գագաթնաժողովում հայտարարել է Վրաստանի վարչապետ Իրաքլի Ղարիբաշվիլին։
Ինչպես տեղեկացնում են Վրաստանի վարչապետի մամուլի ծառայությունից, Ղարիբաշվիլին շնորհակալություն է հայտնել Օբամային եւ մյուս ղեկավարներին գլոբալ անվտանգությանը հավատարիմ մնալու համար եւ խոսել է խաղաղապահ գործողություններում Վրաստանի մասնակցության մասին։
«Մենք կդառնանք ՆԱՏՕ-ի անդամ չհանդիսացող 4-րդ երկիրը, որը կմիանա ՆԱՏՕ-ի արագ արձագանքման ուժերին, ինչը վկայում է Հյուսիսատլանտյան դաշինքի հետ Վրաստանի ԶՈւ գործողությունների համատեղելիության մասին։ Այսօր արագ արձագանքման պահուստային ուժերում կա 130 վրացի մարտիկ։ 2014թ. Վրաստանի ռազմական կոնտինգենտը մասնակցել է Կենտրոնական Աֆրիկայում ԵՄ գործողություններին։ Եվ այս տարի նույնպես Վրաստանը մասնակցում է Կենտրոնական Աֆրիկայում, Մալիում եւ Ուկրաինայում ԵՄ խաղաղապահ առաքելություններին»,- ասել է Վրաստանի վարչապետը, գրում է «Գրուզիա օնլայն»-ը։