Արարատի եւ Վայոց ձորի մարզերի ընդհանուր իրավասության դատարանում քննվում է օգոստոսին Թուրքիայից Հայաստան մուտք գործած՝ Աֆղանստանի քաղաքացի, 31-ամյա Աբդուլսալամ Մեհմեդռեհիմիի գործը: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Մեհմեդռեհիմին, չունենալով Թուրքիայի Հանրապետությունից ՀՀ մուտք գործելու համար համապատասխան փաստաթուղթ, օգոստոսի 4-ին, ժամը 14:20-ի սահմաններում, Արարատի մարզի Արմաշ համայնքի վարչական տարածքին հարակից հատվածով, առանց սահմանված փաստաթղթերի հատել է ՀՀ պահպանվող պետական սահմանը եւ Թուրքիայից մուտք գործել Հայաստանի տարածք: Այստեղ նա բռնվել է սահմանային ծառայություն իրականացնող աշխատակիցների կողմից:
Նրան մեղադրանք է առաջադրվել Քրեական օրենսգրքի 329-րդ հոդվածի 1-ին մասով: Խափանման միջոց է ընտրվել կալանավորումը:
