Հայաստանի Ազգային ժողովի` հոկտեմբերի 5–ին մեկնարկող քառօրյայում նոր Սահմանադրության նախագիծը ենթադրվում է, որ կանցնի առանց լուրջ դժվարությունների, քանի որ կողմ քվեարկելու որոշման մասին հայտարարել է 3 խմբակցություն՝ ՀՀԿ, ՀՅԴ եւ ԲՀԿ: Այնուամենայնիվ, ԱԺ–ում բուռն քննարկումներ են սպասվում` հաշվի առնելով, որ երկու ընդդիմադիր խմբակցություններում կան արմատապես դեմ տրամադրված մի քանի պատգամավորներ։
Մինչեւ փետրվարի 12-ը Սահմանադրական բարեփոխումներին դեմ արտահայտվող ԲՀԿ-ն որոշել է կողմ քվեարկել նախագծին, թեեւ խոսակցություններ կան, որ ԲՀԿ-ական երկու պատգամավոր՝ Հայկ Խաչատրյանն ու Էլինար Վարդանյանը, դեմ են քվեարկելու: «Բարգավաճ Հայաստան» կուսակցությունից դուրս եկած գործարար պատգամավորները նույնպես ասել են, որ կողմ են քվեարկելու:
Դեմ քվեարկելու որոշում այս պահին ունի երկու խմբակցության՝ ՀԱԿ-ն ու «Ժառանգությունը», որոնք միացել են «Ոչ»-ի ճակատին: Ի դեպ, երկու խմբակցություններում էլ կան պատգամավորներ, որոնք հնարավոր է՝ կողմ քվեարկեն նախագծին:
Վերջնական կողմնորոշում չունի միայն ՕԵԿ-ը. խմբակցությունը որոշել է երկուշաբթի փոփոխված տեքստին ծանոթանալուց հետո միայն որոշել՝ ինչպես քվեարկել։
Մինչ խորհրդարանի ներսում խմբակցությունները կքվեարկեն, «Ոչ»-ի ճակատը բողոքի ակցիա կանցկացնի ԱԺ շենքի առջեւ: Հոկտեմբերի 2-ին Երեւանի Ազատության հրապարակում հրավիրված առաջին հանրահավաքը սակավամարդ էր, նախաձեռնության անդամները հույս ունեն, որ երկուշաբթի ԱԺ շենքի առջեւ մարդկանց թիվն ավելի մեծ կլինի:
Նշենք, որ մինչեւ նախագիծը խորհրդարան ուղարկելը Հանրապետության նախագահ Սերժ Սարգսյանը հանդիպել է քաղաքական ուժերի ներկայացուցիչների հետ եւ քննարկել փոփոխությունների փաթեթը: Խորհրդարանական խմբակցություններից հանդիպմանը չեն մասնակցել միայն ՀԱԿ-ն ու «Ժառանգությունը», սակայն նրանց առանձին պատգամավորներ հանդիպման գնացել են, այդ թվում` Լյուդմիլա Սարգսյանը, Հրանտ Բագրատյանը, Ալեքսանդր Արզումանյանը:
Օգոստոսի վերջին նախագիծն ուղարկվեց ԱԺ, որտեղ սեպտեմբերի 15-19-ը դրվեց քննարկման: Մինչեւ քվեարկությունը Սահմանադրական բարեփոխումների մասնագիտական հանձնաժողովի անդամ, խորհրդարանում Սերժ Սարգսյանի ներկայացուցիչ Վարդան Պողոսյանը ներկայացնելու է, թե խմբակցությունների առաջարկություններից քանիսն են ընդունվել եւ ինչ պատճառաբանությամբ:
Հիշեցնենք, որ հոկտեմբերի 1-ին մասնագիտական հանձնաժողովն ավելի քան 6 ժամ քննարկել է խմբակցությունների առաջարկները: Ինչպես NEWS.am-ի հետ զրույցում նշել է հանձնաժողովի անդամ Գագիկ Ղազինյանը, նիստը խորհրդատվական բնույթ է կրել:
«Այս պահին բովանդակային առումով ոչինչ ասել չեմ կարող, սակայն նախագծում սպասվում են փոփոխություններ: Այս տարբերակն առաջիկա օրերին կուղարկվի Հանրապետության նախագահին, եւ միայն վերջինիս հաստատումը ստանալուց հետո այն հոկտեմբերի 5–ին կդրվի քվեարկության»,- ասել է նա:
Թեեւ հանձնաժողովի անդամները չեն նշում՝ ինչ փոփոխություններ են սպասվում, ՀՀԿ-ականները շտապում են հայտարարել, որ իրենց ներկայացրած 300 առաջարկություններից մեծ մասն ընդունվել է: Խմբակցության քարտուղար Գագիկ Մելիքյանի խոսքով՝ ամենաքննադատված դրույթներից մեկը, որը վերաբերում է ընտրություններից հետո երկրորդ փուլի անցկացմանը, տեղափոխվելու է Ընտրական օրենսգրքի կարգավորման տիրույթ։
Հիշեցնենք, որ Սահմանադրության նոր նախագծով նախատեսվում է անցում կատարել կառավարման խորհրդարանական համակարգին եւ համամասնական 100 տոկոսանոց ընտրակարգին: