Երեւանի Հանրապետության հրապարակում այսօր՝ հոկտեմբերի 3-ին, առաջին միջազգային կիսամարաթոնի մեկնարկին հրմշտոց տեղի ունեցավ:
2 կմ վազքի մասնակից՝ 12- 15 տարեկան հարյուրավոր երեխաներ, չսպասելով մեկնարկին, սկսեցին վազել, ինչի հետեւանքով առաջին շարքում կանգնածներն ընկան, մյուսներն էլ՝ նրանց վրա:
Կիսամարաթոնը նախաձեռնած՝ Հայաստանի աթլետիկայի ֆեդերացիայի նախագահ Ռոբերտ Էմմիյանը NEWS.am-ի հետ զրույցում ասաց, որ պատահածի հետեւանքով մի քանի երեխա թեթեւ վնասվածքներ է ստացել, նրանց համար «Շտապօգնություն» են կանչել եւ բուժօգնություն են ցույց տվել:
«Ես անձամբ բազմաթիվ անգամ երեխաներին խնդրեցի, որ մեկնարկը դանդաղ տան: Բայց բոլորն ուզում էին լեգենդար Յուրի Ջորկաեֆի հետ վազել, այդ պատճառով իրար հերթ չտվեցին, մի մասը մյուսից ավելի արագ վազեց եւ միջադեպը գրանցվեց»,- ասաց Ռոբերտ Էմմիյանը:
Նշենք, որ այսօր Երեւանում անցկացվեց առաջին միջազգային կիսամարաթոնը, որին մասնակցեց մոտ 4000 վազորդ տարբեր տարիքային խմբերում՝ մանկական վազք՝ 2 կմ (2500 մասնակից), 5 կմ փոխանցումավազք, 5 կմ պարալամիպիկների մասնակցությամբ վազք, 10 կմ վազք եւ ամենաերկարը՝ 21 կմ վազք:
Կիսամարաթոնը նախաձեռնած՝ Հայաստանի աթլետիկայի ֆեդերացիայի նախագահ Ռոբերտ Էմմիյանի հրավերով կիսամարաթոնին մասնակցեց նաեւ ֆուտբոլի աշխարհի եւ Եվրոպայի չեմպիոն Յուրի Ջորկաեֆը: