Բարոյական չէր լինի, եթե ՕԵԿ-ը դեմ քվեարկեր  Սահմանադրական բարեփոխումների մասնագիտական հանձնաժողովի կողմից ընդունված, իրենց իսկ ներկայացրած առաջարկություններին։ Նման կարծիք է հայտնել Ազգային ժողովի ՕԵԿ խմբակցության ղեկավար Հեղինե Բիշարյանը։ 

Այսօր՝ հոկտեմբերի 5-ին, նոր Սահմանադրության նախագծի քվեարկությունից հետո, անդրադառնալով փաստին, որ ՕԵԿ-ի մի մասը դեմ քվեարկեց, մյուսները՝ ձեռնպահ, Հեղինե Բիշարյանը նշեց․ «Դուք լսեցիք Հովհաննես Մարգարյանին, որը քվեարկությունից առաջ 20 րոպե ընդմիջում խնդրեց եւ հայտարարեց, որ մեր առաջարկություններից մի քանիսն ընդունվել են, մի քանիսը՝ չէ, եւ մենք չենք կարող կողմ լինել Սահմանադրության փոփոխություններին։ Մյուս կողմից բարոյական չէր լինի, որ իրենց կողմից ընդունված մեր որոշակի առաջարկություններին մենք ամբողջությամբ դեմ քվեարկեինք։ Հետեաբար, որոշում կայացրինք, որ ճիշտ կլինի ազատ թողնել, պատգամավորներն իրենք որոշեն՝ ինչպես քվեարկել»։

NEWS.am-ի հարցին, թե հնարավոր ՕԵԿ-ը միանա «Ոչ»-ի ճակատին, Բիշարյանը պատասխանեց․ «Ես «Ոչ»-ի ճակատ չեմ տեսնում, ոչ մի ճակատ էլ չեմ տեսնում։ Ճակատը լուրջ բան է, բայց ես այդ լրջագույն ճակատները չեմ տեսել՝ ոչ «Այո»-ի, ոչ «Ոչ»-ի։ Հընթացս կերեւա, թե մենք ինչ մարտավարություն ենք ընտրում»։

Հիշեցնենք, որ նոր Սահմանադրության նախագիծը հոկտեմբերի 5-ին ընդունվեց 104 կողմ, 10 դեմ եւ 3 ձեռնպահ ձայներով։ ՕԵԿ-ականներից 2-ը դեմ են քվեարկել, մյուսները՝ ձեռնպահ։