Ընդդիմությունը կարող է ամեն ինչ առաջարկել, կոչով դիմել, բայց սահմանադրական փոփոխությունների հանրաքվեն կասեցնելու կոչը անտրամաբանական է։ Այդ մասին NEWS.am-ի թղթակցի հետ զրույցում ասաց ԱԺ ՀՀԿ խմբակցության պատգամավոր Հովհաննես Սահակյանը՝ մեկնաբանելով ՀԱԿ խմբակցության ղեկավար Լեւոն Զուրաբյանի կոչը Սերժ Սարգսյանին։
«Ընդդիմությունը կարող է ամեն ինչ առաջարկել, կոչով դիմել, կարող է դրսեւորվել, ընդունված բոլոր միջոցներով, բայց Լեւոն Զուրաբյանը մինչ նման կոչ անելը պետք է օգտվեր ա հնարավորությունից, որ իրեն ընձեռնվել էր, մասնակցեր սահմանադրական բարեփոխումների գործընթացին ու քննարկումների, հանդիպումների ժամանակ այդ կոչերը իրացներ։ Հնարավորություն ուներ եւ նախագահին։ Մենք տեսանք, որ այս գործընթացը ՀԱԿ-ը ի սկզբանե մերժեց եւ որդեգրեց այլ ճանապարհ։ Հետեւաբար այժմ առնվազն տարօրինակ է կոչով նախագահին դիմելը»,- նշեց Սահակյանը։
Հարցին, արդյոք հանրաքվեի կասեցումը կամ հետաձգումը դրական չի ազդի երկրի քաղաքական իրավիճակի վրա, Սահակյանը պատասխանեց. «Նախ, դեռ չգիտենք, թե երբ է լինելու հանրաքվեն։ Երկրորդ, մենք իհարկե չենք կարծում, որովհետեւ այսօրվա քվեարկության պատկերը (104 կողմ, 10 դեմ 3 ձեռնպահ) խոսում է այն մասին, որ կասեցումը տրամաբանական չէ։ «Ոչ»- կողմնակիցները ԱԺ-ում 10 տոկոս են կազմում։ Այդ դեպքում ժողովրդի անունից խոսելը եւս տրամաբանական չէ։ Կարծում եմ՝ այսօր հաստատվեց այն ճանապարհը, որով մենք շարժվում ենք։ Եւ վերջակետը դնելու է ժողովուրդը՝ իր քվեարկությամբ»։
Ինչպես ավելի վաղ նշել էր NEWS.am-ը, բողոքի ակցիայի ժամանակ Լեւոն Զուրաբյանն ասել էր, որ թեեւ ԱԺ-ն ընդունել է հանրաքվեի դնելու որոշման նախագիծը, սակայն Սերժ Սարգսյանը, որպես երկրի նախագահ, դեռ կարող է կասեցնել այդ գործընթացը: Լեւոն Զուրաբյանը, «Հայ ազգային կոնգրես» կուսակցության անունից նախագահին կոչ էր արել օգտվել իր այդ իրավասությունից եւ կասեցնել հանրաքվեի գործընթացը, որը, ըստ նրա, ժողովրդին տանում է պառակտման:
Հիշեցնենք, որ այսօր ԱԺ-ում ընդունվել է սահմանադրական փոփոխությունների նախագիծը հանրաքվեի դնելու որոշումը, որի կողմ է քվեարկել 104, դեմ՝ 10 պատգամավոր, եւս 3 պատգամավոր ձեռնպահ է եղել: