Հայաստանի երկրորդ նախագահն ընդամենը իր կարծիքն է հայտնել։ Այսօր՝ հոկտեմբերի 6-ին, լրագրողների հետ զրույցում Ռոբերտ Քոչարյանի հարցազրույցին այսպես արձագանքեց ԱԺ ՀՀԿ խմբակցության քարտուղար Գագիկ Մելիքյանը։
«Կգտնվեն մարդիկ, որոնք կկիսեն նրա կարծիքը, բայց հիմնական մեծամասնությունը թե հասարակության, թե քաղաքական ուժերի, այդ կարծիքը չեն կիսի։ Նրանք, ովքեր տրամաբանություն եւ ճշմարտություն կտեսնեն Քոչարյանի խոսքերում, կկիսեն նրա կարծիքը, սակայն կարծում եմ՝ փոքրամասնություն կլինեն այդ մարդիկ»,- ասաց Գագիկ Մելիքյանը։
Մեր դիտարկմանը, թե ըստ Քոչարյանի՝ Սահմանադրական փոփոխություններից հետո երկրում կստեղծվի միակուսակցական համակարգ, ՀՀԿ խմբակցության քարտուղարը նշեց․ «Ես համակարծիք չեմ, նման նախագիծը լայն հնարավորություն է տալիս բազմակուսակցականության զարգացմանը եւ մրցակցությանը, որը ԱԺ ձեւավորման հարցում ժողովրդավարության առումով ավելի առաջադիմական ճանապարհ է»։
Հիշեցնենք, որ հոկտեմբերի 6-ին Հայաստանի երկրորդ նախագահ Ռոբերտ Քոչարյանը հարցազրույց է տվել, որում հայտարարել է, որ ինքը դեմ է Սահմանադրական փոփոխություններին։
