Սահմանադրություն խախտող իշխանությունը պետք է հեռացվի, ոչ թե սահմանադրություն փոխի։ Այդ մասին այսօր՝ հոկտեմբերի 6-ին խորհրդարանի ամբիոնից հայտարարել է ԱԺ ՀԱԿ խմբակցության պատգամավոր, ՀԺԿ նախագահ Ստեփան Դեմիրճյանը։
Ըստ Դեմիրճյանի, ակնհայտ է, որ այսօր սահմանադրական փոփոխությունների օբյեկտիվ անհրաժեշտություն եւ հասարակական պահանջ չկա։ «Ազգային ժողովի երեկվա քվեարկության արդյունքները ( 104 կողմ, 10 դեմ) ամենեւին չեն արտահայտում հասարակության տրամադրությունները։ Ակնհայտ է նաեւ, որ սահմանադրական փոփոխությունների գործընթացը էլ ավելի է բեւեռացնելու հասարակությունը, սրելու է իրավիճակը երկրում, ինչն անթույլատրելի այն ժամանակ, երբ Հայաստանը առանց չափազանցության գտնվում է պատերազմի շեմին։ Այս պայմաններում ճիշտ քայլ կլիներ իշխանությունների կողմից հանրաքվեի կասեցումը, առնվազն հետաձգումը»,- արձանագրել է Դեմիրճյանը։
Նրա կարծիքով, այն շտապողականությունը, որով իրականացվում է սահմանադրական փոփոխությունների գործընթացը ցույց է տալիս, թե որքան է վարչախումբը կարեւորում այս փոփոխությունները իր իշխանությունը երկարաձգելու համար։ «Սակայն Հայաստանին անհրաժեշտ են իրական փոփոխություններ, ոչ թե մի խումբ մարդկանց շահերից բխող եւ հապճեպ իրականացվող սահմանադրական փոփոխություններ։ Գործող սահմանադրությունը բոլորովին չի խոչընդոտում երկրում առկա խնդիրների լուծմանը։ Ամեն գնով սահմանադրական փոփոխություններն անցկացնելու գործելակերպը անընդունելի է։ 2005 թվականին խայտառակ կեղծիքներով ընդունված սահմանադրական փոփոխություններից հետո ի՞նչ է փոխվել մեր երկրում։ Որեւէ առաջընթաց չենք կարող արձանագրել»,- նշել է նա եւ հավելել. «Ժամանակն է հասկանալ, որ ընտրություններ, հանրաքվեներ կեղծելով եւ անվերջ սահմանադրություն փոխելով երկիր չես կայացնի։ Նախ եւ առաջ պետք է կատարել սահանադրության պահանջները, ձեւավորել սահմանադրությունը հարգելու ավանդույթ։ Սահմանադրական նորմերը չպետք է մնան թղթի վրա։ Սահմանադրություն խախտող իշխանությունը պետք է հեռացվի, ոչ թե սահմանադրություն փոխի»։