«Իսրայելը սպառնալիք է Թուրքիայի ազգային անվտանգության համար»,-օգոստոսի 27-ին թուրքական Today's Zaman պարբերականն այպիսի խորագրով մի հոդված է տպագրել։ Հոդվածի հեղինակ Աբդուլլա Բոզքրուտը, վերլուծում է Թուրքիայի «Ազգային անվտանգության սկզբունքները» փաստաթղթի մեջ կատարված փոփոխությունները, որը հայտնի է նաեւ «Կարմիր գիրք» անվամբ։ Ոմանք «Կարմիր գիրքը» համարում են Թուրքիայի գաղտնի սահմանադրությունը։
Բոզքրուտը գոհունակությամբ նշում է, որ Թուրքիայի համար պոտենցիալ սպառնալիք ներկայացնող երկրների ցուցակից ջնջել են Իրանին եւ «եւ այլ սահմանակից պետություններին»։ Նա նաեւ ողջունել է այն փատը, որ Թուրքիայի համար սպառնալիք չեն ներկայացնում Ռուսաստանն ու Հունաստանը։
Սակայն փաստաթուղթը, նրա կարծիքով ունի լուրջ թերություն, Թուրքիայի համար վտանգ սպառնացող երկրների շարքում չի ընդգրկվել Իսրայելը։
Բոզքրուտը գրում է. «Այն բանից հետո, երբ իսրայելցի զինվորականները մայիս ամսին սպանեցին Թուրքիայի 9 քաղաքացու միջազգային ջրերում, Իսրայելը պետք է ընդգրկվի Թուրքիայի ազգային անվտանգությանն սպառնացող երկրների շարքում»:
Հաջորդիվ նա նշում է, որ փաստաթուղթը պետք է նաեւ արտացոլի Իսրայելի սպառնալիքները Թուրքիայի հետ սահմանին, մասնավորապես իրաքյան Քուրդիստանում։ Անկարայի պաշտոնյաները համոզված են, որ իսրայելական հետախուզության աշխատակիցները վարձում են քուրդ ընդդիմադիրներին` Թուրքիայում քաղաքացիական ըմբոստություն առաջացնելու համար»։
Հեղինակը գոհունակությամբ նշում է, որ «Կարմիր գրքից» ամբողջությամբ հանվել են մահմեդական խմբավորումերի մասին հիշատակումները։ Միեւնույն ժամանակ «Կարմիր գրքի» հեղինակները պնդում են, որ նրանք շարունակում են պայքարը մահմեդական ծայրահեղականության դեմ, որի մարմնավորումը «Ալ-Քաիդան» է։
