Սահմանադրության վերջնական տարբերակում այլեւս չկան վիճահարույց կետեր, ինչի արդյունքում էլ հոկտեմբերի 5-ին ԱԺ-ում այն ընդունվեց 104 կողմ ձայնով: Այս մասին այսօր` հոկտեմբերի 9-ին, լրագրողների հետ հանդիպմանն ասաց ԱԺ ՀՀԿ խմբակցության պատգամավոր Գագիկ Մինասյանը` ներկայացնելով, թե լրամշակված տարբերակում ինչ փոփոխություններ են կատարվել:
«Նախեւառաջ հոդված 89-ով, որն այսքան ժամանակ քննարկվում էր, երկրորդ փուլի դրույթը դառնում է բացառություն, իսկ Ընտրական օրենսգրքով հնարավոր է ընտրությունների երկրորդ փուլ, որին կարող են մասնակցել դաշինքները: Այստեղից կարող ենք հետեւություն անել, որ եթե մեծամասնությունը կոալիցիա չկազմի, ապա մյուս ուժերը կարող են ստեղծել դաշինք եւ այդպես մասնակցել: Շատ է քննարկվել նաեւ նախագահի ընտրության կարգը, որի համաձայն` նախագահն ընտրվում էր խորհրդարանի եւ ընտրիչների կողմից: Նոր տարբերակով միայն խորհրդարանն է ընտրելու Հանրապետության նախագահին»,- ասաց Գագիկ Մինասյանը:
Նրա խոսքով` վիճահարույց բոլոր կետերը հանվել են, ապացույցը հոկտեմբերի 5-ին ԱԺ-ում կայացած քվեարկությունն էր, երբ դեմ քվեարկեց ընդամենը տասը պատգամավոր. «Խորհրդարանում չկար մի խմբակցություն, որի բոլոր անդամները դեմ քվեարկած լինեն»:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: