Սիրիայի հյուսիսում մարտական գործողությունների ընթացքում իրանցի գեներալ է սպանվել, ուրբաթ օրը հաղորդել է իրանական Farsnews գործակալությունը։
Գործակալության տվյալներով, գեներալ-մայոր Հուսեյն Համդանին զոհվել է Հալեպում։
«Գեներալ-մայոր, իրանական հեղափոխության պահապան Հուսեյն Համդանին անցյալ գիշեր զոհվել է Սիրիայի հյուսիսում գտնվող Հալեպ քաղաքի շրջակայքում», - գրում է գործակալությունը։
Ավելի վաղ Իրանի ԱԳ նախարար Մոհամմադ Ջավադ Զարիֆը հայտարարել էր, որ Սիրիայում Իրանից միայն ռազմական խորհրդատուներ կան, փոխանցում է «ՌԻԱ Նովոստին»։
Սիրիայում 2011-ի մարտից ի վեր շարունակվում է զինված հակամարտությունը, որին, ՄԱԿ-ի տվյալների համաձայն, զոհ է գնացել ավելի քան 220 հազար մարդ։ Կառավարական զորքերին դիմակայում են գրոհայինների ջոկատները, որոնք տարբեր զինված խմբավորումների են պատկանում։ Ամենաակտիվը «Իսլամական պետություն» եւ «Ջաբհաթ ան-Նուսրա» ծայրահեղական խմբավորումների անդամներն են։
