Սահմանադրական բարեփոխումներին դեմ ակտիվիստները սադրանքների են դիմում։ Այդ մասին հոկտեմբերի 9-ի ԱԺ ճեպազրույցների ժամանակ նշել է իշխող Հանրապետական կուսակցության խմբակցության ղեկավար Վահրամ Բաղդասարյանը։
«Մի միջադեպ եմ հիշում. ակտիվիստը վազում-մտնում է ոստիկանական մեքենա եւ դուրս չի գալիս։ Նրան ասում են՝ դուրս արի, իսկ նա թե՝ չէ, ես էստեղ կմնամ, ընկերներիս հետ։ Իսկ հետո ասում է՝ ինձ բերման են ենթարկել։ Դրան ի՞նչ ասես։ Սեփական դրդապատճառներից ելնելով՝ մարդիկ սադրանքների են դիմում։ Պետք չէ ուշադրություն դարձնել դրան», - ասել է նա։
Ավելի վաղ NEWS.am-ը հաղորդել էր, որ Հայաստանի Ազգային Ժողովը հոկտեմբերի 5-ին հավանություն է տվել սահմանադրական բարեփոխումների նախագծին։ Այդ փոփոխությունները ենթադրում են անցում կառավարման սահմանադրական համակարգի։ Նախագահը հանրաքվեն նշանակել է դեկտեմբերի 6-ին։