Ոստիկանությունում այսօր՝ հոկտեմբերի 10-ին, քննարկվել են Սահմանադրական փոփոխությունների հանրաքվեին նախապատրաստվելու վերաբերյալ հարցեր:
Ոստիկանության լրատվական ծառայությունից NEWS.am-ին հայտնեցին, որ հոկտեմբերի 10-ին ոստիկանության պետ Վլադիմիր Գասպարյանն անցկացրել է աշխատանքային խորհրդակցություն, որին մասնակցում էին ոստիկանության մի շարք ծառայությունների եւ տարածքային ստորաբաժանումների պատասխանատուներ:
Խորհրդակցության ընթացքում կազմակերպչական եւ ծառայողական խնդիրների թվում քննարկվել են նաեւ սահմանադրական բարեփոխումների հանրաքվեին նախապատրաստվելու հարցեր:
Անձնագրային եւ վիզաների վարչությանը, անձնագրային տարածքային ստորաբաժանումներին, ոստիկանության տարածքային բաժիններին, մասնավորապես՝ համայնքային ոստիկանության ստորաբաժանումներին, հանձնարարվել է սկսել հանրաքվեի մասնակիցների ցուցակների ստուգման եւ ճշգրտման, հաշվառման տվյալների իսկության եւ համապատասխանության ստուգման, ցուցակներից մահացածների տվյալների դուրսբերման աշխատանքները:
Վլադիմիր Գասպարյանը կարգադրել է սեղմ ժամկետում հաշվետվություններ ներկայացնել հայտնաբերված անճշտությունների եւ դրանց վերացմանն ուղղված միջոցառումների վերաբերյալ:
Հիշեցնենք, որ Սահմանադրական փոփոխությունների հանրաքվեն նշանակված է դեկտեմբերի 6-ին:
