«Ջրվեժ ինժեներական քաղաք» նախագծի շինարարությունը կսկսվի 2016-ի սկզբին եւ 1,5 տարվա ընթացքում այնտեղ կլինեն առաջին 20 կազմակերպություններն՝ իրենց նոր շենքերով: Այս մասին NEWS.am-ի թղթակցի հետ զրույցում նշեց Ձեռնարկությունների ինկուբատոր հիմնադրամի տնօրեն Բագրատ Ենգիբարյանը:
«Նախատեսում ենք նախագիծն սկսել հաջորդ տարվա սկզբից: Ծրագիրը պետք է կոնցեպտուալ մշակվի, մրցույթ հայտարարվի նաեւ դիզայնի տեսանկյունից, թե ինչ տեսք է ունենալու տեխնոլոգիական քաղաքը: Հավանաբար կառավարության որոշման կարիք կլինի: 2016-ի հունվարից կսկսվեն կազմակերպությունների ընտրությունը եւ շինարարական աշխատանքները: Հուսով ենք, որ դրանից մեկ տարի անց արդեն 20 կազմակերպություններ կլինեն: Այսինքն 1,5 տարի հետո առաջին այցելուներին կարող ենք քաղաքը ցույց տալ, որտեղ կտեսնեն ոչ թե ընդամենը շենքեր, այլ շենքեր հագեցված ինժեներական կազմակերպություններով»,-նշեց Ենգիբարյանը:
Նրա ներկայացմամբ, միջինում տեխնոլոգիական քաղաքը 40 կազմակերպություն պետք է ունենա: «Կարծում ենք՝ 3-5 տարում այն ամբողջովին հագեցված կլինի: Առաջին փուլում ենթակառուցվածքները կկառուցվեն, առաջին 10-15 կազմակերպությունները կսկսեն շինարարությունը: Իսկ հետո մյուս կազմակերպությունները կամաց-կամաց կգան»: