Գործող Սահմանադրությունը ընդհանրապես բացառում է Հայաստանի էվոլյուցիոն զարգացումը: Այս մասին այսօր՝ հոկտեմբերի 13-ին, «Սահմանադրական բարեփոխումները Հայաստանում» խորագրով հանրային քննարկման ժամանակ նշել է «Համաձայնություն» կենտրոնի տնօրեն Դավիթ Շահնազարյանը:
Նրա խոսքով, գործող Սահմանադրությունը փաստացի իշխանափոխության հնարավորություն չի տալիս: «Անկախության 25 տարիների ընթացքում իշխանությունները ոչ մի անգամ ընտրություններով չեն փոխվել»,-արձանագրել է Շահնազարյանը: Նա հիշեցրել է, որ ներկայիս պայմաններում ամբողջական հաղթանակի համար պետք է հաղթել ինչպես նախագահական, այնպես էլ խորհրդարանական ընտրություններում: «Պատկերացրեք՝ եթե ընդդիմությունը հաղթի խորհրդարանական ընտրություններում, իսկ նախագահը մնա նույնը: Դա քաղաքական ճգնաժամ է»,-հայտարարել է նա:
Շահնազարյանի խոսքով, սահմանադրական փոփոխությունների նախագծի կարեւոր դրույթներից մեկն այն է, որ այն փակում է իշխանությունների վերադարձի ճանապարհը: «Հիմա ամբողջ իշխանությունը մեկ մարդու ձեռքում է կենտրոնացած: Նոր Սահմանադրությունը բաժանում է իշխանությունը: Պատգամավորները հնարավորություն են ստանում գործել ըստ իրենց սեփական խղճի ու համոզմունքների, այսինքն լքել խմբակցությունները»,-նկատել է Շահնազարյանը:
Միաժամանակ, նա նշել է, որ նախագիծը որոշակի «ստորջրյա խութեր» ունի այն դրույթներում, որոնք վերաբերում են տարածքային ամբողջականությանը:
«Տեսնում եմ մեծ վտանգ ու չեմ տեսնում ռացիոնալ բացատրություն: Եվ ոչ մի ընդդիմադիր ուժ այս հարցը չի բարձրացրել խորհրդարանում»,-ընդգծել է Շահնազարյանը:
