ԵԱՀԿ/ԺՀՄԻԳ-ը Հայաստանում օրինաստեղծ գործընթացի ամբողջական գնահատում կիրականացնի: Այս մասին այսօր՝ հոկտեմբերի 13-ին, նշվել է ՀՀ արդարադատության նախարար Արփինե Հովհաննիսյանի եւ ԵԱՀԿ/ԺՀՄԻԳ-ի օրենսդրական աջակցության բաժնի պետ էլիս Թոմասի հանդիպման ժամանակ:
Հանդիպման ընթացքում կողմերն անդրադարձել են ԵԱՀԿ/ԺՀՄԻԳ-ի եւ ՀՀ արդարադատության նախարարության միջեւ 2014 թվականին ստորագրված փոխըմբռնման հուշագրին, որի շրջանակում ԵԱՀԿ/ԺՀՄԻԳ-ը հանձն է առել իրականացնել օրինաստեղծ գործընթացի ամբողջական գնահատում՝ ներառելով նաեւ բարեփոխումների վերաբերյալ առաջարկություններ:
Արդարադատության նախարարն ու ԵԱՀԿ/ԺՀՄԻԳ-ի օրենսդրական աջակցության բաժնի պետը քննարկել են նաեւ օրինաստեղծ գործընթացի տարբեր առանձնահատկություններին վերաբերող համատեղ կազմակերպված թեմատիկ սեմինարների ընթացիկ արդյունքներն ու դրանց շրջանակում ստացվելիք առաջարկությունների հետ կապված հետագա գործողությունները:
Նախարարն Էլիս Թոմասի հետ անդրադարձել է նաեւ ԵԱՀԿ/ԺՀՄԻԳ-ի աջակցությամբ Հայաստանում կարգավորիչ դաշտի բարեփոխումների ճանապարհային քարտեզի մշակմանը, ինչպես նաեւ օրենսդրության կատարելագործման ուղղությամբ նախարարության ունեցած տեսլականին:
Արփինե Հովհաննիսյանը բարձր է գնահատել ՀՀ արդարադատության եւ ԵԱՀԿ/ԺՀՄԻԳ-ի միջեւ համագործակցությունն ու այն խորացնելու, դրա շարունակականությունն ապահովելու պատրաստակամություն հայտնել:
