Սիրիայի հարցում Ռուսաստանի եւ ԱՄՆ-ի միջեւ միայն ռազմական համագործակցությունը բավական չէ։ Եվրոպան, ԱՄՆ-ը եւ ՌԴ-ն պետք է համատեղ գործեն հակամարտ կողմերին քաղաքական կարգավորման երկխոսության դրդելու համար։ Այս մասին հայտարարել է ՌԴ նախագահ Վլադիմիր Պուտինը։
«Նախագահ Օբամայի հետ մեր զրույցը այդ առումով շատ բաց էր եւ հանգամանալից։ Ընդհանուր առմամբ մենք համատեղ աշխատանքի մեջ ընդհանուր շահեր տեսանք։ Սակայն ցավոք այսօր այդ աշխատանքը տարվում է միայն պաշտպանական գերատեսչությունների մակարդակով։ Ես ենթադրում եմ, որ դա բավական չէ։ Ես ելնում եմ նրանից, որ եթե մենք ցանկանում ենք ավելի արդյունավետ գործել, ոչ թե ուղղակի կրակել կամ հրթիռներ արձակել, այլ հասնել քաղաքական կարգավորման, ապա պետք է համատեղ աշխատանք տանենք Սիրիայի տարածքում տարբեր ուժերի հետ»,- մեջբերում է Պուտինի խոսքը «ՌԻԱ Նովոստի»-ն։