Զինված ուժերի կառուցվածքն այնպիսին, որ հնարավորություն է տալիս ցանկացած ժամանակ կայուն ղեկավարել, նաեւ սահմանադրական փոփոխությունների պարագայում: Այս մասին, այսօր՝ նոյեմբերի 23-ին, ԱԺ-ում լրագրողների հետ զրույցում նշել է ՀՀ Զինվածու ուժերի գլխավոր շտաբի պետի տեղակալ Մովսես Հակոբյանը՝ անդրադառնալով ընդդիմության այն մտահոգություններին, որ սահմանադրական փոփոխություններից հետո խաղաղ պայմաններում չի լինելու գերագույն գլխավոր հրամանատար, իսկ պատերազմի դեպքում՝ որոշում կայացնելու լիազորությունը բաշխվելու է տարբեր թեւերի միջեւ, ինչն դա անորոշություն է ստեղծելու:
Նա նշել է, որ որպես զինվորական իրեն չի թույլատրվում կարծիք հայտնել սահմանադրական փոփոխությունների նախագծի վերաբերյալ: Դիտարկմանը, թե պաշտպանության նախարարը ակտիվորեն «այո» է քարոզում, նա արձագանքել է. «Պաշտպանության նախարարը քաղաքական պաշտոն է եւ նա իրավունք ունի իր կարծիքն արտահայտելու»:
Մովսես Հակոբյանը վստահեցրել է, որ հանրաքվեի ժամանակ զինվորականներին չի պարտադրվելու «այո» ասել: «Կարող եք վերահսկել, դուք դրա լիազորություններն ունեք: Կարծում եմ, որեւէ մի քաղաքացի պարտադրված չի գնալու քվեարկելու»,-ընդգծել է Մովսես Հակոբյանը:
Դիտարկմանը, որ ԼՂՀ նախագահ Բակո Սահակյանը հայտարարել է, որ իրենք կարող են քննարկել Ստեփանակերտի օդանավակայանը Սիրիայում ահաբեկչության դեմ պայքարի համար օգտագործելու հարցը, եւ արդյոք արժե՞ Ղարաբաղը ներքաշել Սիրիայում ահաբեկչության դեմ պայքարի մեջ, նա արձագանքելն է. «Դա իմ ոլորտը չէ, ես նման հարցերով չեմ զբաղվում եւ այդպիսի հարցերով գլուխս չեմ ծանրաբեռնում»: