Սահմանադրական փոփոխությունների նոր նախագծով մարդու իրավունքներն ավելի պաշտպանված են, որը շատ կարեւոր է: Այս մասին այսօր՝ նոյեմբերի 24-ին, «Այո»-ի եւ «Ոչ»-ի ռեալիթի շոուի շրջանակում Արարատի մարզի Մասիս քաղաքում հավաքվածներին ասել է ԱԺ ՀՅԴ խմբակցության պատգամավոր Արծվիկ Մինասյանը:
«Այսօր մենք ունենք գործող սահմանադրություն, որտեղ մարդու իրավունքները միայն թղթի վրա են գրված,չեն իրականացվում: Փոփոխություններով այս իրավունքները միս ու արյուն են ստացել»,-ասաց Արծվիկ Մինասյանը:
ԱԺ ՀԱԿ խմբակցության պատգամավոր Հրանտ Բագրատյանն էլ նշեց, որ, եթե գործող սահմանադրություն ինչ-որ հոդվածներ թերի են, դրա համար հարկավոր չէր փոխել ամբողջ սահմանադրությունը, կարելի էր ուղղակի վերանայել այդ հոդվածները:
«Ինչու՞ եք ափալ-թափալ փոխում ամբողջ սահմանադրությունը, ինչ-որ հոդվածներ եթե խանգարում էին, դրանք միայն փոխեիք: Ի՞նչ կարիք կար ամբողջ սահմանադրությունը փոխելու, ի՞նչ է նոր սահմանադրությամբ են լուծվելու երկրի տնտեսական հարցերը»,-ասաց Հրանտ Բագրատյանը:
Նշենք, որ «Հարավ» ուղղության «Այո»-ի մասնակիցներն են՝ Սահմանադրական բարեփոխումների մասնագիտական հանձնաժողովի անդամ Հրայր Թովմասյանը, Հայաստանի PR ասոցիացիայի նախագահ Արման Սաղաթելյանը, ԱԺ «Հանրապետական» խմբակցության պատգամավորներ Վարդան Այվազյանը, ԱԺ ՀՅԴ խմբակցության պատգամավոր Արծվիկ Մինասյանը: Իսկ «Ոչ»-ի ճակատից են հասարակական կարծիքի ուսումնասիրության կենտրոնի նախագահ Թամարա Գեւորգյանը, քաղաքական գործիչ Ազատ Արշակյանը, ակտիվիստ Վաղինակ Շուշանյանը, ԱԺ պատգամավոր Հրանտ Բագրատյանը:
