Կործանելով ռուսական Սու-24 ինքնաթիռը՝ Թուրքիան եւս մեկ անգամ ապացուցեց, որ միշտ եղել եւ մնում է իսլամական խալիֆայության կողմն ու նրանց գլխավոր հովանավորն է: Այս մասին NEWS.am-ի թղթակցի հետ զրույցում հայտարարեց ռուսական Քաղաքական եւ ռազմական վերլուծությունների ինստիտուտի տնօրենի տեղակալ Ալեքսանդր Խրամչիխինը:
Քաղաքագետի խոսքով, այն, որ Թուրքիան ահաբեկչության հովանավորն է, ակնհայտ եւ վաղուց հայտնի փաստ է, որն անհնար է թաքցնել: Արդյո՞ք Ռուսաստանն ու Թուրքիան կզոհեն իրենց տնտեսական շահերն ու կներգրավվեն քաղաքական պայքարի մեջ, ըստ Խրամչիխինի, առայժմ պարզ չէ, սակայն Կրեմլում պետք է գիտակցեն, որ Թուրքիան թշնամի է. «Թուրքիան ուղղակի, բացահայտ թշնամի է, եւ միշտ է այդպես եղել»:
Խրամչիխինն ընդգծեց, որ Սու-24-ի հետ կապված միջադեպը կանխամտածված եւ նախապես ծրագրված քայլ է: «Դա Սիրիայում «Իսլամական պետության»՝ բենզին փոխադրող բեռնատարների ոչնչացման պատասխանն էր: ԻՊ-ի կողմից սիրիական նավթի պաշարների վերահսկողությունը շահեկան է ոչ միայն ահաբեկչական կազմակերպության, այլեւ Թուրքիայի համար: Ռուսաստանը վնասեց ԻՊ-ի եւ Թուրքիայի փոխշահավետ համագործակցությանը»,- նշեց քաղաքագետը:
Հիշեցնենք, որ Ռուսաստանի նախագահ Վլադիմիր Պուտինը Սիրիայի օդային տարածքում Սու-24-ի կործանումը մեջքից հարված է կոչել, որը հասցրել են ահաբեկիչներին սատարողները:
