Մենք դեռ շատ ամպագոռգոռ հայտարարություններ ենք անում, բայց սովորականի պես ամենամարտունակ ռազմական ստորաբաժանումը «Ռոսսելխոզնադզորն» է, որը կայծակնային արագությամբ թուրքական թռչնմսի մեջ գլիստերիա հայտնաբերեց։ Այս մասին իր բլոգում գրել է ռուս ընդդիմադիր քաղաքական գործիչ Ալեքսեյ Նավալնին՝ անդրադառնալով Սիրիայում Սու-24 օդանավը խոցելու միջադեպին։
«Ողջ երկիրն ուզում է տեղը դնել Թուրքիային։ Եվ իհարկե մենք պարտավոր էինք ինչ-որ լուրջ պատժամիջոցներ ընդունել. Էրդողանը մեր օդանավը խոցել է իր PR-ի, քարոզչության նկատառումներով, այլ ոչ թե անվտանգության միջոցառումներից ելնելով։ Դա չի կարելի անտեսել, բայց նաեւ ռազմական էսկալացիա չպիտի լինի»,- նշել է նա՝ կարծիք հայտնելով, որ իրենց առաջին քայլը պետք է լինի Հայոց ցեղասպանության պաշտոնական ճանաչումը։
«Պահն իդեալական է, քայլը հենց քաղաքական կլինի, բայց Թուրքիայի համար՝ շատ ցավոտ։ Դա հենց այն է, որ «եթե այդպես, ուրեմն մենք էլ այսպես»։ Դրանից պետք է սկսել։
Շատ են գրում, իսկ Վիքիպեդիան ասում է, որ Հայոց ցեղասպանությունն արդեն ճանաչվել է։ Այո, կա Պետդումայի հայտարարությունը, որն արվել էր 1995թ.։
Բայց մենք խոսում ենք քաղաքական սիմվոլիզմից։ Հայոց ցեղասպանությունը կարելի է անվերջ ճանաչել։ Կարելի է բարձրացնել ճանաչման մակարդակը։ Կարելի է Ֆրանսիայի պես պատժել ցեղասպանությունը ժխտողներին։ Կարելի է դատապարտել երկրները, որոնք դա չեն արել։ Հիշատակի օրեր սահմանել։ Աշխատել միջազգային ճանաչման ուղղությամբ»,- գրել է Նավալնին։
