Սահմանադրական փոփոխություններով առաջարկվող համակարգը խորհրդարանական չէ: Այսօր՝ նոյեմբերի 26-ին, «Այո»-ի եւ «Ոչ»-ի ռեալիթի շոուի շրջանակում Տավուշի մարզի Նոյեմբերյան քաղաքի բնակիչների հետ հանդիպմանը նման կարծիք է հայտնել «Ոչ» քարոզող, «Հայազ» կուսակցության վարչության անդամ Արմեն Մկրտչյանը:
«Այս նախագիծը ներկայացվում է՝ որպես խորհրդարանական համակարգի մոդել, սակայն որպես քաղաքագետ հավաստիացնում եմ ձեզ, որ սա իրականությանը չի համապատասխանում: Աշխարհում ընդամենը մի օրինակ կա այսպիսի մոդելի. Իտալիայի մաֆիոզ իշխանություններն իրենց գործունեությունը շարունակելու համար առաջարկեցին հենց այսպիսի փոփոխություն»,- ասել է Արմեն Մկրտչյանը:
Կուսակցության վարչության անդամի խոսքով՝ աշխարհում չկա մի օրինակ, երբ խորհրդարանական ընտրություններն անցկացվում են երկու փուլով. Արմեն Մկրտչյանը համոզված է, որ երկփուլ դրույթը մտցվել է՝ ՀՀԿ-ի կայուն մեծամասնությունն Ազգային ժողովում պահպանելու համար:
«Բացի դրանից, Սերժ Սարգսյանն այս փոփոխություններն անում է Հանրապետական կուսակցության նախագահ մնալու համար, երբ կունենա երկրի կառավարման հնարավոր բոլոր լծակները, սակայն չի կրի որեւէ պատասխանատվություն»,- նշել է Արմեն Մկրտչյանը:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: