ԱԺ ՀԱԿ խմբակցության ղեկավար, «Ոչ»–ի ճակատի շտաբի ղեկավար Լեւոն Զուրաբյանը կարծում է, որ «Ոչ»-ի ճակատը հաղթել է, եւ ժողովուրդը դեկտեմբերի 6-ին միասնականորեն «ոչ» է ասելու սահմանադրական փոփոխություններին:
Հայաստանի քաղաքագետների միության գրասենյակում այսօր՝ նոյեմբերի 26-ին, կլոր սեղան-քննարկման ժամանակ Լեւոն Զուրաբյանը նշեց, որ իշխանությունները շատ լավ հասկացել են, որ ընդդիմադիր ուժերը միասնական են սահամանադրական փոփոխությունները մերժելու հարցում:
«Ճակատագրական հնարավորություն է ստեղծվել թոթափելու այս գիշատիչ ռեժիմին: Ժողովուրդը հասկանում է, որ նոր Սահմանադրության ընդունումով իշխանությունների համար հնարավորություն է ստեղծվելու իրենց կեղեքումը շարունակելու համար: Ժողովուրդը հասկացել է, որ դեկտեմբերի 6-ին ունենալու է պատմական շանս` «ոչ» ասելու նոր Սահմանադրությանը: Ժողովրդի միասնական «Ոչ»-ը ջարդելու է ընտրակեղծարարության մեքենան»,- ասաց Լեւոն Զուրաբյանը:
Լեւոն Զուրաբյանի խոսքով՝ իշխանությունները հասկանում են, որ քարոզարշավը տապալվել է, եւ պետական հիմնարկների աշխատողներին «այո» քվեարկելու հանձնարականներ տալու իրենց ավանդական մեթոդները չեն աշխատում:
«Մարդիկ գնալու են ու «ոչ» քվեարկեն, իրենք չեն վախենում աշխատանքից հեռացվելուց, որովհետեւ ամբողջ Հայաստանը չի կարող աշխատանքից հեռացվել»,- ասաց նա՝ նշելով, որ իշխանությունների կողմից ընտրակաշառք չի բաժանվելու, քանի որ դա անիմաստ ռեսուրսի կորուստ է եւ հակառակ արդյունք է բերելու:
Լեւոն Զուրաբյանի խոսքով՝ «Այո»-ի շտաբում խուճապային տրամադրություններ են, նրանց միակ ռազմավարությունը ընտրատեղամասերում վստահված անձանց, դիտորդներին, հանձնաժողովի անդամներին գայթակղիչ առաջարկներ անելով արձանագրությունները կեղծելն է: Նա նշեց, որ իրենք կաշառքի դեպք են արձանագրել ու նկարահանել:
«Մարզպետները, քաղաքապետները մոտենում են քաղաքացիներին, կաշառք առաջարկում: Մենք նկարահանել ենք շատ դեպքեր, մի դեպք ուղարկելու ենք գլխավոր դատախազին՝ որպես հանցագործության մասին հաղորդում»,- ասաց նա:
Նշենք, որ սահմանադրական հանրաքվեն վերահսկելու նպատակով հրավիրված քննարկման ներկա էր նաեւ «Ժառանգություն» կուսակցության ղեկավար Րաֆֆի Հովհաննիսյանը, որը հանդիպման կեսից գնաց եւ հրաժարվեց պատասխանել լրագրողների հարցերին: Քննարկման ներկա են նաեւ «Հիմնադիր խորհրդարանի» քարտուղարության համակարգող Ժիրայր Սեֆիլյանը, ԱԻՄ առաջնորդ Պարույր Հայրիկյանը եւ «Ոտքի Հայաստան» նախաձեռնության խորհրդի անդամ Անդրիաս Ղուկասյանը եւ ՀՀ–ում հավատարմագրված դեսպանությունների ներկայացուցիչներ:
Նշենք, որ Սահմանադրության հանրաքվեն, որով նախատեսվում է անցում կառավարման խորհրդարանական համակարգին, տեղի կունենա դեկտեմբերի 6-ին:
