Որպեսզի իշխանություններն իրենց փոխեն, մեխանիզմներ են անհրաժեշտ։ Այս մասին NEWS.am-ի թղթակցի հետ զրույցում հայտարարել է ՀՀԿ խմբակցության պատգամավոր, «Այո» եւ «Ոչ»» ռեալիթի շոուի մասնակից Վարդան Այվազյանը՝ անդրադառնալով քաղաքացիների այն հակադարձումներին, որ Սահմանադրությունը փոխելու փոխարեն, թող իշխանություններն իրենց փոխեն։
«Գիտեք ինչ կա, որպեսզի իշխանությունները իրենց փոխեն համենայնդեպս նաեւ մեխանիզմներ են անհրաժեշտ։ Ես էլ նրանց նույն ձեւի հարց եմ տալիս, բա որ դուք ընտրություններին փոփոխություններ եք ուզում ու վերահսկողության մեխանիզմներ, որը թույլ չի տալիս ներկայիս Սահմանադրությունը որոշակի դրույթների հետ կապված, ինչու եք դեմ այդ փոփոխությանը»,-ասել է Այվազյանը։
Ըստ Այվազյանի՝ նախագիծը իշխանության մեջ փոփոխությունների հնարավորություն տալիս է, ընդդիմությունը վերահսկողական լծակներ է ունենալու, վերանալու է մեծամասնական ընտրակարգը, որի արդյունքում ՀՀԿ-ն եւս 37 պատգամավոր էր ունենում։
Վերջինս նշել է, որ ռեալիթի շոուի միջոցով հաջողվում է քաղաքացիներին իրազեկել նոր նախագծի բովանդակության մասին, ինչի ընթացքում փաստաթուղթը եւ նրանց հավանությանն է արժանանում եւ հակառակն է լինում։
««Ոչ» էլ կա, «այո» էլ կա, ճիշտ ա, կարող ա պատահի՝ մեր աչքին «այո»-ն մի քիչ շատ ա թվում, բայց երկուսն էլ կա։ Կարեւոր խնդիրը նրա մեջ է, որ ռեալիթի շոուի մեջ իրականացնում ենք ազգաբնակչության իրազեկում։ Մենք դրականն ու բացասականը ներկայացնում ենք, նրանք թող կողմնորոշվեն»։
Այվազյանը սրտնեղել է, որ ընդդիմությունը փաստերից չի խոսում, խնդիրը պայմանավորում է սոցիալական իրավիճակի հետ։ «Ասում ա՝ սոցիալական վիճակը չի լավանում, ես կարծում եմ, որ եթե փաստաթղթի մասով են խոսեն, լուրջ հիմնավորումներ չկան»։
Մեր հիշեցմանը՝ Հրանտ Բագրատյանը պնդում է, որ այդ փոփոխությունը միտված է Արցախի որոշ շրջաներ հանձնելուն, ինչի պատասխանատվությունից խուսափում է Սերժ Սարգսյանը, Այվազյանն ասել է․ «Նմանատիպ հարցերը, որ պետք է լուծվի խորհրդարանի 60-70 տոկոսով, ոնց ա մտածում ընդդիմությունը՝ մեկի՞ վրա է հեշտ ճնշում գործադրել, թե 60 տոկոսի վրա։ Վաղը չէ մյուս օրն ասենք Ղարաբաղի հարցն է քննարկվում, արդեն ընդդիմությունն էլ պիտի մասնակցի, ո՞րն ա ավելի հեշտ միհոգով, թե 60 տոկոսով։ Ես, որ ես եմ, կողմնակից չեմ տարածքները հանձնելուն, եթե չլինի ռեալ երաշխիք Ղարաբաղը չունենա անկախություն, վերջի վերջո էդ տարածքների հանձնելու հարցը հարաբերական է, դա պիտի որոշի Ղարաբաղի իշխանությունը»։