Հանրաքվեի կենտրոնական հանձնաժողովն այսօր՝ նոյեմբերի 26-ին, գումարած արտահերթ նիստում սահմանել է դեկտեմբերի 6-ի հանրաքվեի քվեաթերթիկի նմուշը: Այս մասին հայտնում են Կենտրոնական ընտրական հանձնաժողովից:
ԿԸՀ մամուլի ծառայության փոխանցմամբ՝ հաստատվել է նաեւ հանրաքվեի քվեաթերթիկի էլեկտրոնային տարբերակի նմուշը: Այսօր ժամը 20.00-ից «Տիգրան Մեծ» հրատարակչությունում մեկնարկում է քվեաթերթիկների տպագրման գործընթացը:
Դիտորդները, զանգվածային լրատվության միջոցների ներկայացուցիչները, վստահված անձինք կարող են տպագրության ողջ ընթացքում տպագրատանը հետեւել քվեաթերթիկների տպագրմանը: Արտահերթ նիստում, ՀՀ հանրաքվեի կենտրոնական հանձնաժողովի որոշմամբ, սահմանվել է նաեւ քրեակատարողական հիմնարկներում կազմավորված թվով 8 տեղամասերում քվեարկության սկիզբը:
ՀՀ հանրաքվեի կենտրոնական հանձնաժողովի նիստում մեկնարկ է տրվել էլեկտրոնային եղանակով քվեարկության համակարգին: Հայաստանի Հանրապետության Սահմանադրության փոփոխությունների հանրաքվեի` էլեկտրոնային եղանակով քվեարկությունն սկսվում է 2015 թվականի նոյեմբերի 27-ից` Երեւանի ժամանակով ժամը 08:00-ից, եւ ավարտվում` 2015 թվականի դեկտեմբերի 1-ին՝ Երեւանի ժամանակով ժամը 20:00-ին:
