Սահմանադրական փոփոխությունները հնարավորություն են տալու ունենալ ավելի ուժեղ Ազգային ժողով, ավելի ուժեղ իշխանություն ընդդիմություն: Այս մասին այսօր՝ նոյեմբերի 27-ին «Այո եւ Ոչ»-ի ռեալիթի շոուի շրջանակում Արմավիրի մարզի Եղեգնուտ համայնքում բնակիչների հետ հանդիպմանն ասել է «Այո»-ի ճակատը ներկայացնող, ԱԺ «Հանրապետական» խմբակցության պատգամավոր Կարինե Աճեմյանը:
«Եթե մեզ մոտ ամեն ինչ լավ լիներ, ի՞նչն էինք փոխելու: Մենք շատ լավ գիտենք ձեր խնդիրների մասին, այս տարիներին հասկացել ենք, որ ունենք խնդիրներ եւ դրանք կառավարման համակարգում են: Այս փոփոխությունը հենց այն մարդկանց համար են, որ ունեն բողոքներ: Այս պարագայում ես համոզված եմ՝ մեր սոցիալական խնդիրներն ավելի հեշտ կլուծվեն»,- նշել է նա:
Կարինե Աճեմյանի խոսքով՝ փոփոխություններն ուժեղացնում են ընդդիմության լիազորությունները, եւ եթե ընդդիմությունն այսօր խուսափում է պատասխանատվությունից, դա նշանակում է, որ այն հեռանում է ժողովրդից:
«Մենք ունենք թույլ ընդդիմություն, ուզում ենք, որ ընդդիմությունն ուժեղանա: Մեկ մարդու որոշումով, մեկ կուսակցության հզորացմամբ երբեք արագ չի կարելի երկիրը առաջ տանել: Այս փոփոխությունը օգնելու է մեզ դինամիկ զարգանալ: Մեզ պետք է փոխել համակարգը, որ մեր կյանքը փոխվի»,- ասել է նա:
Նշենք, որ «Հարավ» ուղղության «Այո»-ի մասնակիցներն են՝ Սահմանադրական բարեփոխումների մասնագիտական հանձնաժողովի անդամ Հրայր Թովմասյանը, Հայաստանի PR ասոցիացիայի նախագահ Արման Սաղաթելյանը, ԱԺ «Հանրապետական» խմբակցության պատգամավորներ Կարինե Աճեմյանը, Վարդան Այվազյանը: Իսկ ոչ-ի ճակատից են հասարակական կարծիքի ուսումնասիրության կենտրոնի նախագահ Թամարա Գեւորգյանը, քաղաքական գործիչ Ազատ Արշակյանը, ակտիվիստ Վաղինակ Շուշանյանը, ԱԺ պատգամավոր Հրանտ Բագրատյանը:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: Այդ փոփոխություններով նախատեսվում է անցում կատարել խորհրդարանական կառավարման համակարգի:
