Գյումրին «Այո» չի ասելու Սահմանադրական փոփոխությունների նախագծին: Այս մասին այսօր՝ նոյեմբերի 28-ին, Գյումրիում անցկացվող «Ընդդիմության միասնական շտաբի» հանրահավաքի ժամանակ հայտարարել է «Նոր Հայաստան» փրկության ճակատի ներկայացուցիչ, «Հիմնադիր Խորհրդարանի» նախագահ Գարեգին Չուգազսյանը:
«Գյումրին «Ոչ»-ի քաղաք է: Մենք շատ լավ գիտենք, որ Գյումրիում Սահմանադրական փոփոխությունների համար «Այո» գոյություն չունի: Գյումրին այն քաղաքներից է, որն ամենաշատն է զգում, որ երկիրը խանության է վերածվել, եւ բազմիցս ապացուցել է, որ «Ոչ» է ասում այս հանցավոր ռեժիմին: Մենք եկել ենք Գյումրի ամփոփելու քարոզարշավը, եւ տեղեկացնելու, որ մենք ոչ ենք ասում ոչ միայն սահմանադրական փոփոխություններին, այլեւ այս ռեժիմին»,-իր ելույթում նշել է Չուգազսյանը:
Նրա խոսքով՝ սահմանադրական փոփոխությունների քարոզարշավից պարզ է դարձել, որ եկել է իշխանափոխության ժամանակը: «Փոփոխությունների ժամանակը մոտ է, ռեժիմը մի ծուղակ է ստեղծել սահմանադրական փոփոխություն անվամբ, որով փորձում է հաստատել իր կուսակցապետությունը, որով վիրահատություն է կատարում հիվանդ մարմնի վրա: Պետք է ուժեղացնել մարմինը, հետո լավացնել սահմանադրությունը: Ռեժիմը արկածախնդրության է գնացել, եւ ինքն էլ ընկնելու է իր ծուղակի մեջ, որովհետեւ մեր ժողովուրդը, օգտվելով սահմանադրական փոփոխությունների քարոզարշավից, ոտքի է կանգնում եւ «Ոչ» է ասում այս իշխանություններին»,-նշել է ՀԽ նախագահը:
«Նոր Հայաստանը» գյումրեցիներին հրավիրել է դեկտեմբերի 1-ին Ազատության հրապարակում կայանալիք համապետական հավաքին, որը, ըստ փրկության ճակատի անդամների, Հայաստանում իշխանափոխություն իրականացնելու գործընթացի սկիզբն է:
Հանրահավաքին մասնակցում են «Ժառանգություն» կուսակցության առաջնորդ Րաֆֆի Հովհաննիսյանը, «Հիմնադիր խորհրդարանի» առաջնորդ Ժիրայր Սեֆիլյանը եւ այլք:
Նշենք, որ նախաձեռնությանը կազմում են «Ժառանգություն», «Ժողովրդավարական Հայրենիք» կուսակցությունները, ԱԻՄ-ը՝ դիտորդի կարգավիճակով, ինչպես նաեւ՝ «Հիմնադիր խորհրդարանը» եւ «Ոտքի՛, Հայաստան» քաղաքացիական նախաձեռնությունը:
