«Ժառանգություն» կուսակցության առաջնորդ Րաֆֆի Հովհաննիսյանը վստահ է, որ «Նոր Հայաստան» փրկության ճակատը հաղթանակելու է իշխանափոխություն անելու իր ծրագրում, որի համար, սակայն, նաեւ շարքային հայաստանցին տեւական եւ միասնական պայքար պետք է մղի:
«Մենք ասում ենք, որ այս գործը ավարտվելու է հաջողությամբ եւ հաղթանակով, բայց դա միայն գոռալով չի լինելու, դա տեւական, միասնական պայքարով է լինելու: Մենք ակնկալում ենք, որ նոր Հայաստանի բերելու է ոչ միայն ճակատի անդամների, այլեւ շարքային քաղաքացու պայքարը: Եկեք մի անգամ գործենք, տեր լինենք, եւ մեր հնազանդությունը ցույց տանք մեր պայքարով, մեր ողնաշարով, մեր այդ դեպքում միայն կունենանք մեր երազած նոր Հայաստանը: Հիմա քարոզի ժամ չկա արդեն, դեկտեմբերի 1-ին Ազատության հրապարակում հավաքվելու ենք, եւ կգնանք որքան որ պետք է: Մենք ակնկալում ենք, որ շարքային հայաստանցին մեզ հետ հավասար որպես շահակիր եւ ջահակիր կլինի մեր պայքարում»,- այս մասին այսօր՝ նոյեմբերի 28-ին Գյումրիում «Ընդդիմության միասնական շտաբի» հանրահավաքին իր ելույթում ասել է Րաֆֆի Հովհաննիսյանը:
Րաֆֆի Հովհաննիսյանը նշել է, որ դեկտեմբերի 6-ին կայանալիք Սահմանադրական փոփոխությունների հանրաքվեն նախագահական եւ խորհրդարանական ընտրություններից վճռորոշ է լինելու, եւ պետք է միասնական պայքարի միջոցով կասեցվի:
«Մենք միասին գտնվում ենք հայ ժողովրդի եւ պետության համար բախտորոշ խաչմերուկի առջեւ, որը ավելի կարեւոր է քան ցանկացած նախագահական կամ խորհրդարանական ընտրություն, որովհետեւ այսօր, այս տարի Հայաստանի հրապարակներում վճռվելու է մեր երկրի ապագան, պետականության որակը եւ լինել չլինելու հարցը: Մեր մեր դրոշակը կլինի ՄԱԿ-ի գրասենյակի առաջ, բայց մի գրոշի արժեք չի ունենա, եթե մենք միասին այս տարի չկերտենք նոր Հայաստանը իր ապագան սահմանադրական ազգային քաղաքացիական հայրենիքը»,- նշել «Ժառանգության» առաջնորդը:
Նշենք, որ «Նոր Հայաստան» փրկության ճակատը դեկտեմբերի 1-ին Ազատության հրապարակում համապետական հանրահավաք կանցկացնի: Հանրահավաքով սկիզբ է դրվում իշխանափոխություն իրականացնելու գործընթացի սկիզբը եւ նախատեսվում է կասեցնել դեկտեմբերի 6-ին կայանալիք Սահմանադրական փոփոխությունների հանրաքվեն:
Նախաձեռնության կազմում են «Ժառանգություն», «Ժողովրդավարական Հայրենիք» կուսակցությունները, ԱԻՄ-ը՝ դիտորդի կարգավիճակով, ինչպես նաեւ՝ «Հիմնադիր խորհրդարանը» եւ «Ոտքի՛, Հայաստան» քաղաքացիական նախաձեռնությունը:
