Թուրքիայի նախագահը չէր թաքցնում ռուսական ինքնաթիռի ոչնչացման դրդապատճառները` պնդելով, որ Անկարան Սու-24-ի վրա հարձակումն իրականացրել է Սիրիայի իր «եղբայրների» անվտանգության եւ իրավունքների պաշտպանության համար: Սակայն եղբայրների մասին խոսելիս` Ռեջեփ Թայիփ Էրդողանը նկատի ուներ ոչ միայն թուրքմեններին, այլեւ Անկարայի աջակցությունը վայելող ահաբեկչական կազմակերպություններին, որոնցից շատերը ԻՊ-ին հավատարմության երդում են տվել, գրում է «ՌԻԱ Նովոստին»` վկայակոչելով Il Giornale-ին:
Բացարձակ իշխանության 20 տարվա ընթացքում Էրդողանին հաջողվեց իսլամացնել երկիրը եւ էքսպանսիոն քաղաքականություն իրականացնել: Գաղտնիք չէ, որ նա մտադիր է Սիրիայի հյուսիսը` Հալեպի եւ Լաթաքիայի միջեւ ընկած տարածքը վերածել Թուրքիայի 82-րդ նահանգի` խաղարկելով այդ շրջանում ապրող թուրքմենների խաղաթուղթը, նշում է հոդվածի հեղինակը:
Էրդողանը պնդում է ռազմական միջամտության վրա, որը նրան հնարավորություն կտար չեզոքացնել շիական առանցքը` Իրանը, Սիրիային եւ «Հզբոլլահին»: Արդեն չորս տարի է` Թուրքիան փորձում է իշխանությունից հեռացնել Ասադին, դրա համար նա ֆինանսավորել է ահաբեկիչներին եւ Դամասկոսի վարչակարգի դեմ պարտիզանական պատերազմը, իր օդանավակայանները լցրել է օտարերկրացի զինվորականներով նրանց Սիրիա ուղարկելու համար եւ ջիհադիստներին ռմբակոծելու փոխարեն, հրետակոծում էր քրդերին` ԻՊ-ի թշնամիներին: Անկարան խալիֆաթից մաքսանենգ նավթ էր գնում մեկ բարելի դիմաց 15-20 դոլար գնով, իսկ հետո դա վերավաճառում էր կրկնակի գնով: Սակայն շիական առանցքի շնորհիվ հատկապես` ռուսական միջամտության, որը ոչնչացրեց Էրդողանի կայսերական երազանքները, Ասադը շարունակում է պահել իշխանությունը, գրում է պարբերականը:
Երեւում է` այժմ Թուրքիան պատերազմի պատրվակ է փնտրում` դրա մեջ ներքաշելով ՆԱՏՕ-ին, ինչի մասին դեռեւս մի տարի առաջ ասել էր գերմանացի գեներալ Հարալդ Կույաթը: «Թուրքիան ուզում է ՆԱՏՕ-ին ներքաշել այս իրավիճակի մեջ, որովհետեւ նրա իրական նպատակը Ասադին իշխանությունից հեռացնելն է», - ասել է Կույաթը:
