Նոր Սահմանադրությամբ սահմանափակվում են մարդկանց իրավունքները: Այս մասին այսօր՝ նոյեմբերի 29-ին, «Այո»-ի եւ «Ոչ»-ի ռեալիթի շոուի շրջանակում Կոտայքի մարզի Հրազդան քաղաքում քաղաքացիների հետ հանդիպմանն ասել է Գերագույն խորհրդի նախկին պատգամավոր Ազատ Արշակյանը, որը «Հարավ» ուղղության «Ոչ»-ի քարոզիչ է:
«Ես նախագծի սեւագրությունը տեսել եմ, դրա մեջ որոշ բաներ կային մեր իրավունքներից: Այսինքն՝ այն գրողները գիտեն՝ լավը որն է ու մեզ մատուցում են ամենավատը: նոր Սահմանդրությունում տարրական բաներ են բացակայում, ժողովրդավարության համար: Շատ վատ, մեզ ճորտացնելու ծրագիր է եւ շատ վատ մասնագետներ են դա կատարել»,- ասել է նա:
Նախկին պատգամավորի խոսքով՝ նոր Սահմանադրությունը քաղաքացիներին զրկում է իշխանություններից հաշիվ պահանջելու, նրան պատժելու հնարավորությունից:
«Նախագահ չեք կարող ընտրել, քաղաքապետ չեք կարող ընտրել, գյուղապետ չեք կարող ընտրել, դրանցից ոչ մեկին հետ կանչելու իրավունք չունեք: Ձեզ ամսի 6-ին կանչելու են, ասեն՝ ստորագրեք, որ մենք տերն ենք, դուք ծառան»,- նշել է նա:
Հայաստանի PR ասոցիացիայի նախագահ Արման Սաղաթելյանի խոսքով՝ նոր Սահմանադրությամբ քաղաքական ուժերը պատասխանատու են լինելու այնքան, որքան ժողովուրդը կվստահի նրանց:
«Ընտրությունների ժամանակ յուրաքանչյուրը գալիս, դոշ է ծեծում, ասում է՝ ինձ ընտրի: Եթե չընտրվեց, էլ անելիք չունի, հինգ տարի պիտի հայհոյի, քարկոծի, փնովի:, նոր Սահմանադրությունը քաղաքական փոքրամասնությանը նույնպես իրավունքներ է վերապահում, ու իրար քարկոծելու փոխարեն ստիպում է համագործակցել: Ստիպում է, որ ընտրողների շահերը առաջ տանելով գան ընդհանուր հայտարարի»,- ասել է նա:
Նշենք, որ «Հարավ» ուղղության այո-ի մասնակիցներն են՝ Սահմանադրական բարեփոխումների մասնագիտական հանձնաժողովի անդամ Հրայր Թովմասյանը, Հայաստանի PR ասոցիացիայի նախագահ Արման Սաղաթելյանը, ԱԺ «Հանրապետական» խմբակցության պատգամավորներ Կարինե Աճեմյանը, Վարդան Այվազյանը: Իսկ ոչ-ի ճակատից են հասարակական կարծիքի ուսումնասիրության կենտրոնի նախագահ Թամարա Գեւորգյանը, քաղաքական գործիչ Ազատ Արշակյանը, ակտիվիստ Վաղինակ Շուշանյանը, ԱԺ պատգամավոր Հրանտ Բագրատյանը:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: Նոր Սահմանադրությամբ նախատեսված է անցում կատարել կառավարման խորհրդարանական համակարգի: