Տարածաշրջանում լարված իրավիճակ ,է եւ այդ իրավիճակում ժողովրդին հեղափոխության կոչեր անելը սխալ է: Այս մասին այսօր` նոյեմբերի 30-ին, լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Վահան Բաբայանը՝ հավելելով. «Աշխարհում լրջագույն հանցավոր գործարքներ են տեղի ունենում, եւ Հայաստանը լարված աշխարհաքաղաքական կիզված կետում է եւ գտնում եմ, որ նման հեղափոխություն անելու կոչերը սխալ են»:

«Րաֆֆի Հովհաննիսյանը, որը տապալված քաղաքական գործիչ է, հետ է եկել եւ ինչ-որ բաներ է խոսում, որին ոչ ոք այլեւս չի հավատում, ուզում է դեկտեմբերի 1-ին հեղափոխություն անել: Մարդկանց տարավ հանրահավաքի, հետո աղոթեց ու գնաց: Դեկտեմբերին 1-ին հեղափոխություն անելու կոչ է անում Հմայական Հովհաննիսյանի պես մոռացված վերլուծաբան, սակայն մեզ այսօր համախմբում ու միասնություն է պետք, քանի որ մի տարածքում ենք ապրում, որտեղ մեծ խնդիրներ կան, դեկտեմբերի 1-ն արդեն տապալված է»,-ասաց Վահան Բաբայանը:

«Չեք անցկացնի» նախաձեռնության անդամ, ՀԱԿ կուսակցության անդամ Արշակ Մուսախանյանն էլ նշեց, որ չի կարծում, որ դեկտեմբերի 1-ի հանրահավաքը տապալվելու է, նրա խոսքով, «Չեք անցկացնի» նախաձեռնությունը դեկտեմբերի 1-ին գնալու է Ազատության հրապարակ եւ սատարելու է «Նոր Հայաստանին»:

«Պարոն Բաբայանի ասածները ոստիկանապետի ելույթի էր նման, խոսեց գեոպոլիտիկ վերլուծություններից ու իրավական հարցերից միայն: Մենք համագործակցել ենք «Նոր Հայաստանի» հետ, համագործակցում ենք նաեւ հիմա, մասնակցելու ենք նաեւ դեկտեմբերի 1-ի գործընթացներին, սակայն ոչ որպես կազմակերպիչներ»,-ասաց Արշակ Մուսախանյանը:

Հիշեցնենք, որ «Նոր Հայաստան» հանրային փրկության ճակատը 2015թ. դեկտեմբերի 1–ին Երեւանի Ազատության հրապարակում հրավիրել է համազգային հանրահավաք: