Ազգային ժողովի ՀՀԿ խմբակցության պատգամավոր Լեւոն Մարտիրոսյանը համոզված է, որ խորհրդարանական ընտրություններում երկրորդ փուլի անհրաժեշտություն երբեք չի լինելու:
«Ես ինքս դեմ եմ արտահայտվել այս դրույթին, ինքս համոզված եմ, որ երկրորդ փուլի անհրաժեշտություն երբեք չի լինելու: Սա գրված է այն իրավիճակի համար, երբ կոալիցիա չի կազմվի, բայց նման բան չի լինելու երբեք»,- ասաց Լեւոն Մարտիրոսյանը:
ՀՀԿ-ական պատգամավորը հիշեցրեց, որ ինքը միշտ դեմ է արտահայտվել հարյուր տոկոսանոց համամասնական ընտրական համակարգին, սակայն այնուամենայնիվ, կողմ է Սահմանադրական փոփոխություններին:
«Ես կողմ եմ հարյուր տոկոսանոց մեծամասնական ընտրական կարգին: Ես իմ կարծիքը միշտ էլ հրապարակավ հայտնել եմ: Պարտադիր չէ, որ ամեն ինչին կողմ լինենք: Այնուամենայնիվ, այս փոփոխությունները մեկ քայլ առաջ են եւ պետք է կողմ քվեարկել»,- նշեց նա:
Լեւոն Մարտիրոսյանը հորդորեց կողմ քվեարկել Սահմանադրական փոփոխություններին, հակառակ դեպքում հասարակությունը կողմ է գործող Սահմանադրությանը:
