Սահմանադրական փոփոխություններով առաջարկվում է երկրորդ փուլի անցկացում, որպեսզի երկիրը ոչ մի դեպքում չհայտնի ճգնաժամային իրավիճակում: Այսօր՝ դեկտեմբերի 1-ին, լրագրողների հետ հանդիպմանը նման կարծիք հայտնեց Ազգային ժողովի փոխնախագահ, ՀՀԿ մամուլի խոսնակ Էդուարդ Շարմազանովը՝ անդրադառնալով նախագծի 89-րդ հոդվածին:
«Այս հոդվածը հնարավորություն է տալիս, որ եթե առաջին փուլից հետո քաղաքական ուժերը չեն կարողանում կոալիցիա կազմել, կարող է լինել երկրորդ փուլ, որով կստեղծվի կայուն մեծամասնություն: Եթե այս հոդվածը չլիներ, մենք կվերածվենք կամ Թուրքիայի, կամ Հունաստանի: Մենք ցնցումների տանելու հայրենիք չունենք»,- ասաց Շարմազանովը:
ՀՀԿ մամուլի խոսնակի խոսքով՝ երկրին այսօր անհրաժեշտ է կայունության ամրապնդում, անցնցում կառավարում, անցնցում իշխանափոխություն, առավել արդյունավետ կառավարում եւ անվտանգության բարձր մակարդակ: Դիտարկմանը, թե 89-րդ հոդվածը մտցվել է, որ հենց ՀՀԿ-ն առաջիկա տարիներին լինի մեծամասնություն, Շարմազանովն ընդգծեց. «Նորմալ եւ բարոյական չէ, երբ քաղաքական կուսակցությունը եւ քաղաքական գործիչը գնում են ընտրությունների եւ ասում, որ չեն ուզում հաղթել: Հանրապետականին «բոբո» մի սարքեք: Իր թերություններով հանդերձ՝ ամենակայացած քաղաքական ուժն ենք: Մենք մեր աչքի գերանը տեսնում ենք, դրա համար ուզում ենք վերափոխել մեր կառավարման համակարգը: Այո, ես հաստատում եմ, որ տեսանելի ապագայում Հայաստանի քաղաքական դաշտում ամենահզոր կուսակցությունը Հանրապետականն է: Ուզենք, թե չուզենք, այսպես է»:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին:
