Հայաստանի քաղաքացիներին շատ քիչ են հետաքրքրում սահմանադրական բարեփոխումները. խնդիրը ոչ թե Սահմանադրությունն է, այլ սահմանադրականությունը: Այս մասին դեկտեմբերի 1-ի մամուլի ասուլիսի ժամանակ հայտնել է «Ժառանգություն» կուսակցության կառավարման փոխնախագահ Արմեն Մարտիրոսյանը:
Նրա խոսքով, հայկական հասարակության 90-95 տոկոսը դեմ է սահմանադրական բարեփոխումներին: Իշխանությունները, ըստ Մարտիրոսյանի, այլընտրանք չունեն. նրանք ստիպված են կեղծիքների գնալ, ձայներ գողանալ, ակնհայտ է նաեւ ընտրական հանձնաժողովների անդամներին վախեցնելու գործընթացը: «Հայաստանում իշխանությունները, ամբողջովին վերացնելով ընտրությունների համակարգը, մեզ թողել են միայն հրապարակն ու փողոցը: Դրա համար էլ «Ժառանգությունը», ես ու Րաֆֆի Հովհաննիսյանը ստեղծել ենք «Նոր Հայաստան» ճակատը: Այսօր երեկոյան ժամը 6-ին մենք անհնազանդության հավաք կանենք ու կփորձենք այդ ճանապարհով կասեցնել Սահմանադրության բարեփոխումը: Մենք այլ ճանապարհ չունենք: Բայց մենք բացառապես խաղաղ անհնազանդության կողմնակից ենք»,- շեշտել է Արմեն Մարտիրոսյանը, հավելելով, որ իրենք բախումների չեն գնա, բայց ցանկացած քաղաքացի ինքնապաշտպանության իրավունք ունի:
Հիշեցնենք, որ սահմանադրական փոփոխությունների հանրաքվեն Հայաստանում կանցնի դեկտեմբերի 6-ին: Սահմանադրական փոփոխությունների նախագծով նախատեսված է անցում կառավարման խորհրդարանական ձեւին:
