Սահմանադրական փոփոխություններին «այո» ասելով՝ ժողովուրդը «դաբրո» է տալու այն ամենին, ինչն այսօր ապօրինություն է համարվում: Այսօր՝ դեկտեմբերի 1-ին, «Այո»-ի եւ «Ոչ»-ի ռեալիթի շոուի շրջանակում Գեղարքունիքի մարզի Գանձակ համայնքի բնակիչների հետ հանդիպմանը նման կարծիք է հայտնել «Հայազն» կուսակցության վարչության անդամ Արմեն Մկրտչյանը:
«Մենք դեմ ենք «Հանրապետական» կուսակցությանը, մենք հոգնել ենք, եկեք՝ «Ոչ» ասենք Սահմանադրական փոփոխություններին, կամ «Այո» ասենք իշխանափոխությանը: Այս փաստաթղթին «այո» քվեարկելով՝ մենք «դաբրո» ենք տալու այն ամենին, ինչը մինչեւ օրս համարվել է ապօրինություն, եւ վաղվանից համարվելու է օրինականություն»,- ասել է նա:
Արմեն Մկրտչյանի խոսքով՝ Սահմանադրության գործառույթն է թեթեւացնել հասարակության կյանքը, կարգավորել պետական համակարգի աշխատանքը, մինչդեռ առաջարկվող նախագիծը չի լուծում սոցիալական, արդարադատության, մարդու իրավունքների խնդիրները:
Նշենք, որ «Հյուսիս» ուղղության «Այո»-ի մասնակիցներն են՝ ԱԺ «Հանրապետական» խմբակցության պատգամավորներ Մարգարիտ Եսայանը, Սամվել Ֆարմանյանը, ԱԺ ԲՀԿ խմբակցության պատգամավոր Միքայել Մելքումյանը, ՀՅԴ անդամ Արթուր Եղիազարյանը: Իսկ «Ոչ»-ի ճակատից են «Հայազն» կուսակցության ներկայացուցիչ Արմեն Մկրտչյանը, «Ազատ Դեմոկրատներ» կուսակցության ներկայացուցիչ Նարեկ Այվազյանը, Վարդան Խաչատրյանը:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: Այս փոփոխություններով նախատեսված է անցում կատարել կառավարման խորհրդարանական համակարգի: