Միացյալ նահանգները պաշտպանում է Թուրքիայի ինքնապաշտպանության իրավունքը: Այս մասին երեքշաբթի հայտարարել է ԱՄՆ նախագահ Բարաք Օբաման Կլիմայական փոփոխությունների հարցերով ՄԱԿ_ի Համաշխարհային համաժողովի շրջանակում:
«ԱՄՆ-ն աջակցում է՝ իրեն ու իր օդային տարածքը պաշտպանելու Թուրքիայի իրավունքը »,- հայտարարել է նա: Ընդ որում Օբաման շեշտել է, որ Թուրքիայի նախագահ Թայիփ Էրդողանի հետ բանակցությունների ընթացքում քննարկվել է այն հարցը, որ «Թուրքիան ու Ռուսաստանը կարող են միասին աշխատել ՝ լարվածությունը թոթափելու ուղղությամբ» ու գտնել ստեղծված խնդրի լուծման դիվանագիտական ճանապարհը, հայտնում է ՏԱՍՍ-ը:
Փարիզում երկուշաբթի հավաքվել էին աշխարհի 150 երկրների առաջնորդները, որպեսզի քննարկեին, ու ինչպես դիտորդներն են ակնկալում, ստորագրեին նոր համաձայնագիրը, որը պետք է փոխարինի Կիոտոյի արձանագրությանը: Վերջինիս գործողության ժամկետը ավարտվում է 2020 թ., իսկ նոր համաձայնագիր կնքելու փորձերն առայսօր ապարդյուն են եղել . ՄԱԿ-ի կլիմայական հարցերին նվիրված նախորդ համաժողովներում ՝ 2009 թ. Կոպենհագենում ու 2012 թ. Դոհայում, համաձայնեցված որոշում չի կայացվել: