Ռուսաստանը ՆԱՏՕ-ի սահմանի ողջ երկայնքով՝ Միջերկրական ծովից հեռավոր հյուսիս, ՀՕՊ ժամանակակից համալիրներ է տեղակայում։ Այս մասին ՆԱՏՕ-ի արտգործնախարարների հանդիպման ժամանակ հայտնել է ՆԱՏՕ-ի գլխավոր քարտուղար Յենս Սթոլթենբերգը։
«Ռուսաստանը ՆԱՏՕ-ի սահմանի ողջ երկայնքով ՀՕՊ ժամանակակից համալիրներ է տեղակայում։ Սիրիայից եւ Միջերկրական ծովի արեւելքից բացի, մենք նման գործողություններ ենք նկատում Ղրիմում, Բալթյան երկրների մոտակայքում, Կալինինգարդում եւ հյուսիսային սահմաններին։ Դրանք այն ժամանակակից բարդ հնարավորություններն են, որոնք ապահովում են օդային տարածության արգելափակումը։ ՆԱՏՕ-ն հարմարվում է այդ գործողություններին, մեծացնում է դաշինքի արեւելյան երկրներում իր ներկայությունը։ Մենք ուշադիր հետեւում եւ գնահատում ենք այդ գործողությունները։ Դա անվտանգության ոլորտում մեր նոր շրջապատի մասն է»,- ասել է Սթոլթենբերգը, փոխանցում է ՏԱՍՍ-ը։
Նա եւս մեկ անգամ հիշեցրել է, որ ՆԱՏՕ-ի արտգործնախարարները Բրյուսելում կքննարկեն Եվրոպայում ռազմական ակտիվության թափանցիկության մակարդակի բարձրացումը։