Սահմանադրական փոփոխություններից հետո կձեւավորվի հակամենաշնորհային տնտեսական միջավայր, որի միջոցով հնարավոր կլինի ազատվել օլիգարխներից։ Այսօր՝ դեկտեմբերի 1-ին այս մասին «Այո եւ ոչ» ռեալիթի շոուի շրջանակում Նոր Հաճն-ի բնակիչների հետ հանդիպման ժամանակ հայտարարել է «Այո»-ի ներկայացուցիչ, ՀՅԴ-ական Արծվիկ Մինասյանը։
«Այս փոփոխությունից հետո, երկրում պիտի իրականացվի հակամենաշնորհային քաղաքականություն, որը հնարավորություն կտա տնտեսությունը ազատել օլիգախներից։ Եւ նախաձեռնություն ցուցաբերող քաղաքացիները կկարողանան տնտեսական գործունեություն ծավալել»,-նշել է Մինասյանը։
«Այո»-ի ճակատի ներկայացուցիչը, որպես առավելություն, շեշտել է կուսակցական համակարգի կայացումը, որը բոլոր ուժերի համար հավասար հնարավորություն է ստեղծում։
«Այդ փոփոխություններից հետո պիտի ընդունվի կուսակցություների մասին օրենք ու ընտրական օրենսգիրք։ Այսօր գործում են կուսակցություններ, որոնք ֆիանանսավորվում են մեկ մարդու կողմից, բայց ոչ երբեք անկախ ֆինանսավորմամբ։ Սպասարկում են այս կամ այն օլիգարխի շահերը։ Մինչդեռ եթե, օրինակ, պետբյուջեից կուսակցությունը ֆինանսավորվի, արդեն կպարտավորվի ծառայել հանրությանը, ոչ թե օլիգարխներին»,-ասել է դաշնակցական պատգամավորը։ Ըստ նրա՝ նոր Սահմանադրությամբ հնարավորություն կստեղծվի ձեւավորել ազատ արդար ընտրությունները ահահովվող մարմին, որը գործող Սահմանադրությունը թույլ չի տալիս։
«Ընտրական օրենսգրքով հնարավորություն ենք ստանալու ձեւավորել ընտրական հանձնաժողով, որն ամբողջական պատասխանատվություն է կրում ազատ ընտրությունների համար։ Մինչդեռ էդպիսի սուբյեկտ հիմա չունենք։ Ո՞վ է հիմա պատասխանատու ազատ ընտրությունների համար, չունենք, չկա նման մարմին»,-եզրափակել է «Այո»-ի ներկայացուցիչը։
