ԼՂՀ նախագահ Բակո Սահակյանը սեպտեմբերի 6-ի իր հրամանագրով մարտական դիրքերը պաշտպանելիս ցուցաբերած վճռական գործողությունների, հրամանատարության հանձնարարությունները եւ ծառայողական պարտականությունները հստակ կատարելու համար «Արիության համար» մեդալով պարգեւատրել է երկու զինվորականի:
ԼՂՀ նախագահի մամուլի ծառայությունից NEWS.am-ին հայտնում են, որ պարգեւատրվող զինվորականներն են ԼՂՀ պաշտպանության բանակի գնդացրորդ, շարքային Խաչատուր Բաղդասարյանը եւ ԼՂՀ ՊԲ նռնակաձիգ, շարքային Արմեն Մանուկյանը:
Հիշեցնենք, որ սեպտեմբերի 4-ին՝ ժամը 06:50-ի սահմանում ղարաբաղա-ադրբեջանական զորքերի շփման գոտու հյուսիսարեւելյան ուղղությամբ (Ջրաբերդ բնակավայրից մոտ 2կմ արեւելք) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ: Դիվերսանտներից մեկը ցատկել է խրամատ եւ ձեռնամարտի բռնվել ժամկետային զինծառայողների հետ: Ժամկետային զինծառայող Արմեն Մանուկյանին հաջողվել էր տապալել ադրբեջանցի հատուկջոկատայինին, իսկ վրա հասած ծառայակիցը գնդակահարել էր հակառակորդին:
Ադրբեջանական գրոհայինները` ՊԲ մարտական հենակետում թողնելով 1 դիակ, հետ են շպրտվել: Փախուստի ճանապարհին դիվերսիոն խմբի անդամները պայթել էին ականների վրա: Հրոսակներից մեկը ստացած վնասվածքներից զոհվել էր:
Ադրբեջանցի հրոսակները դիվերսիոն գործողություններ էին իրականացրել նաեւ օգոստոսի 31-ին Ադրբեջանի եւ Լեռնային Ղարաբաղի զինված ուժերի շփման գծում՝ Վերին Չայլու բնակավայրի ուղղությամբ: Մերձամարտի արդյունքում վնասվածքներ էր ստացել ԼՂՀ Պաշտպանության բանակի զինծառայող Ռուդիկ Մանասերյանը:
Իսկ հունիսի 18-ին Չայլուի ուղղությամբ Լեռնային Ղարաբաղ էր ներխուժել ադրբեջանական զինված դիվերսիոն խումբը: Մարտի ընթացքում հայկական կողմը կորցրել էր 4 զինվոր, եւս 4-ը՝ վիրավորվել էին:
