Այցելությամբ Բաքվում գտնվող Հարավային Կովկասում ԵՄ հատուկ ներկայացուցիչ Պիտեր Սեմնեբին հանդիպումներ է անցկացնում այդ երկրի ընդդիմադիր ուժերի եւ Իլհամ Ալիեւի գլխավորած «Ենի Ազերբայջան» կուսակցության ներկայացուցիչների հետ: Իշխող կուսակցության փոխնախագահ Ալի Ահմեդովի հետ հանդիպման ժամանակ, ըստ պաշտոնական տեղեկատվության, «մտքերի փոխանակում է տեղի ունեցել նոյեմբերի 7-ին կայանալիք խորհրդարանական ընտրությունների նախապատրաստման եւ նախընտրական հասարակական քաղաքական մթնոլորտի վերաբերյալ»:
Սեպտեմբերի 6-ին Սեմնեբին հանդիպել է նաեւ ընդդիմադիր «Մուսավաթ» կուսակցության առաջնորդ Իսա Ղամբարի հետ: Հանդիպումներ են նախատեսված նաեւ «Ումիդ» կուսակցության ղեկավար Իգբալ Աղազադեի եւ «Ադրբեջանի ժողովրդական ճակատ» կուսակցության առաջնորդ Ալի Քերիմլիի հետ:
Ադրբեջանական APA գործակալության հաղորդմամբ` լրագրողների հետ հանդիպման ժամանակ, Պիտեր Սեմնեբին հայտարարել է, որ միջազգային հանրությունը մեծ ուշադրությամբ հետեւում է Ադրբեջանում ընթացող նախընտրական իրավիճակին: Դա տեղի է ունեցել Ադրբեջանի ԱԳ նախարար Էլմար Մամեդյարովի հետ հանդիպումից հետո:
Սեմնեբին հատուկ նշել է ընտրությունները լուսաբանելու, թեկնածուների ծրագրերի հետ ընտրողներին ծանոթացնելու կարեւորությունը: «Հուսով եմ, որ լավ հնարավորություններ կստեղծվեն քաղաքական ուժերի համար, որ կարողանան հանդիպել, բնակչության, ընտրողների հետ, իսկ ընտրողները՝ կարողանան ծանոթանալ քաղաքական ուժերի եւ թեկնածուների ծրագրերին»,- ասել է նա:
Սեմնեբին նշել է, որ Եվրամիության երկրներից ժամանած դիտորդները նախկինի պես կմասնակցեն ԵԱՀԿ դիտորդական առաքելությանը: Սեմնեբին չի բացառել անգամ իր մասնակցությունը դիտորդական առաքելությանը:
ԵՄ հատուկ ներկայացուցիչը հայտնել է նաեւ, որ արտգործնախարարի հետ քննարկվել են ղարաբաղյան կարգավորման, խոսքի ազատության ոլորտում տիրող իրավիճակի, Վրաստանում եւ Իրանում ձեւավորված իրավիճակի հարցերը:
Խորհրդարանական ընտրություններն Ադրբեջանում կայանալու են նոյեմբերի 7-ին:
Սկսած 2005թ.-ից ընտրությունները կայանում են միայն մեծամասնական ընտրակարգով: Համամասնական ընտրակարգով քվեարկությունը չեղյալ է հայտարարվել կառավարող կուսակցության նախաձեռնությամբ, ինչը զրոյի է հավասարեցնում ընդդիմադիր ուժերի մուտքը խորհրդարան: Ադրբեջանի խորհրդարանն ունի 125 պատգամավոր: