Երեւանի Ազատության հրապարակից մեկնարկեց «Ոչ»-ի ճակատի եւ «Նոր Հայաստան» փրկության ճակատի համատեղ երթը Երեւանի կենտրոնական փողոցներով` դեկտեմբերի 6–ին կայացած սահմանադրական հանրաքվեի արդյունքները անվավեր ճանաչելու պահանջով։
«Նոր Հայաստանը» հաջորդ հանրահավաքը հրավիրել է դեկտեմբերի 11-ին, ժամը 17:00-ին, որից հետո նորից երթ կլինի: Մինչեւ այդ ամեն օր Ազատության հրապարակում ժամը 17:00-ին կլինեն տեղեկատվական հավաքներ լրագրողների համար:
Հանրահավաքի ավարտին ՀԱԿ–ի ներկայացուցիչ Լեւոն Զուրաբյանը հրապարակավ «Նոր Հայաստանին» առաջարկեց միանալ դեկտեմբերի 10–ին ՀԱԿ–ի կողմից կազմակերպվող ամենամյա մարդու իրավունքների պաշտպանության երթին։ «Ժառանգության» առաջնորդ Րաֆֆի Հովհաննիսյանը տեղում հայտարարեց, որ իրենք կմիանան երթին։
Նշենք, որ Հայաստանում դեկտեմբերի 6-ին սահմանադրական փոփոխությունների հանրաքվե անցկացվեց: Քվեաթերթիկների վերջնական հաշվարկի արդյունքում ԿԸՀ հրապարակած թվերի համաձայն` 63,35 տոկոսը (825 851 ընտրող) «այո» է քվեարկել սահմանադրական փոփոխություններին, 32,35 տոկոսը՝ «ոչ» (421 600 ընտրող): Ընդդիմությունը հայտարարում է, որ հանրաքվեն կեղծվել է։