Սիրիայի հնագույն հուշարձանների պահպանության պետական գործակալության ղեկավար Մամուն Աբդուլքարիմը Թուրքիային մեղադրել է Սիրիայից արժեքավոր իրեր գողանալու մեջ։ Բացի այդ, նա հիշեցրել է, որ Անկարան հրաժարվել է տեղեկություններ տրամադրել գողացած հուշարձանների գտնվելու վայրի մասին, հայտնում է Reuters-ը։
Աբդուլքարիմի խոսքով՝ հենց Թուրքիա են տարվել Փալմիրայի եւ Իրաքի հետ սահմանին գտնվող Մարի հնագույն քաղաքի արժեքավոր գտածոները։ «Թուրքիայում հայտնաբերվել են Սիրիայից դուրս հանված ավելի քան 2 հազար գտածո։ Թուրքիան հրաժարվում է կազմել դրանց ցանկը եւ մեզ վերադարձնել։ Երկրի իշխանությունները ոչինչ չեն անում»,- ասել է Աբդուլքարիմը։ Նա հավելել է, որ 2015թ. Սիրիայի իշխանությունները կարողացել են սահմանին առգրավել մոտ 6500 հնագույն նմուշ, որոնք փորձում էին տանել Հորդանան, Լիբանան եւ Թուրքիա, փոխանցում է Lenta-ն։
Թուրքիայի մշակույթի նախարարությունը մեղադրանքներն անհիմն է որակել՝ հայտարարելով, որ Անկարան Դամասկոսի հետ բանակցություններ է վարում Սիրիայից դուրս բերված արժեքավոր իրերը վերադարձնելու շուրջ։
