Հայկական հյուրընկալությունը զիջում է վրացականին: Այս մասին ասված է «Ավտովզգլյադ» կայքում հրապարակված «Ի՞նչ կարժենա Հայաստանով ավտոուղեւորությունը» վերնագրով հոդվածում:
«Վրաստան մտնելիս սահմանապահներն ու մաքսայինի աշխատակիցները բառացիորեն ուրախություն են ճառագում ավտոմեքենայով մարդ տեսնելիս, որոնք պատրաստվում են իրենց երկրում որոշակի քանակությամբ գումար թողնել: Եվ ոչ մի ապահովագրության եւ ճանապարհային վճարի մասին այստեղ խոսք չկա: Իսկ Հայաստանն անհապաղ ճանապարհորդին տեղեկացնում է ապահովագրության եւ տրանսպորտային միջոցի հարկի մասին»,- գրում է ճանապարհորդ Կոնստանտին Գուսեւը:
Հեղինակի խոսքով, երբ երթեւեկում ես Հայաստանի խորքերով, տպավորություն է ստեղծվում, որ ոչ թե ավտոմեքենայի, այլ ժամանակի մեքենայի ղեկին ես: Եվ հայտնվել ես ոչ թե պայծառ ապագայում, այլ խորհրդային անցյալում: «Չնայած աղքատությանը՝ Հայաստանում բենզինի մեկ լիտրը շուրջ մեկ դոլար արժե: Այնպես որ՝ պետք է Վրաստանում լավ լիցքավորվել, քանի որ այնտեղ նույն բենզինի մեկ լիտրը շուրջ 45 ռուբլի արժե»,- գրում է նա:
Այնուհետեւ հեղինակը պատմում է, որ իր ճամփորդությունը համընկել է ձյան առատ տեղումների հետ: Արդյունքում ավտոմայրուղիները եւ նույնիսկ Երեւանը ծածկվել են ձնով, որը ոչ ոք չի հավաքում: Ինչ վերաբերում է Հայաստանի ավտոպարկին, ապա, ըստ Գուսեւի, այստեղ այնպիսի տեխնիկա է, որը Ռուսաստանում վաղուց փտում է բակերում:
Երեւանում տաքսին ամենաէժան փոխադրամիջոցն է: Հեղինակը պարզաբանում է. օրվա ցանկացած ժամի կարելի է փողոցում տաքսի գտնել: Բայց հետո շարունակում է. «Հանրահայտ Սեւանա լիճն ապշեցնում է ոչ այնքան բնության գեղեցկությամբ, որքան ափամերձ սրճարանների սարսափելի գներով, որտեղ կերակրում են ամենեւին էլ ոչ թարմ սիգից աղի ձկնապուրով: Եվ հետո նաեւ թեյավճար են պահանջում: Հենց այդ պատճառով էլ հայերն իրենք նախընտրում են արձակուրդն անցկացնել հարեւան Վրաստանում. ավելի էժան է ստացվում»:
«Այսօր ե՛ւ Վրաստանը, ե՛ւ Հայաստանը ռուսաստանյան զբոսաշրջիկների համար այցելության պոտենցիալ վայր են: Վրացիները ձգտում են ամեն ինչ առավելագույնս էժան մատուցել, երբեմն՝ նույնիսկ անվճար (օրինակ՝ երկիր մուտքը), իսկ հայերը՝ հակառակը, ձգտում են ամեն ինչից մի բան պոկել: Պրակտիկան ցույց է տալիս, որ վերջինը ոչ մի լավ բանի չի հանգեցնում»,- ամփոփել է Գուսեւը: